काठमाडौं– नयाँ वर्ष २०८० को आगमनसँगै पर्यटकीय क्षेत्रमा पर्यटकको चहलपहल बढेको छ । उपत्यकासहित देशका विभिन्न ठाउँमा नयाँ वर्षको अवसरमा मेला महोत्सव समेत भइरहेका छन् ।
पोखरा, लुम्बिनी, चितवन, धनगढी, नेपालगञ्ज, इलाम लगायत प्रमुख पर्यटकीय गन्तव्यहरुमा पनि नयाँ वर्ष विशेष विभिन्न मेला, महोत्सव र कार्यक्रम भइरहेका छन् । नयाँ वर्षको मौका छोपेर होटल रेष्टुराहरुले २० देखि ४० प्रतिशतसम्म छुट दिएकाले पनि घुम्न जानेहरु आकर्षित भएका छन् ।
नयाँ वर्ष २०८० मनाउन तनहुँको पर्यटकीय नगरी बन्दीपुर आन्तरिक पाहुनाले भरिएको छ । नयाँ वर्षलाई स्वागत गर्न हिजोदेखि नै बन्दिपुरमा पर्यटकको भिड बढेको बन्दिपुर पर्यटन विकास समितिका सचिव वसन्त पौडेलले जानकारी दिए ।
नयाँ वर्षका अवसरमा बन्दिपुरमा सडक खाना महोत्सव आयोजना गरिएकाले पर्यटकको सङ्ख्या बढेको उनले बताए । यस्तै, पर्यटकीय नगरी पोखरामा नयाँ वर्षको स्वागतका लागि भव्य कार्यक्रम भइरहेको छ ।
पोखराको लेकसाइडमा हजारौँ स्वदेशी तथा विदेशी पर्यटक पुगेका छन् । ठाउँ ठाउँमा भजन, पन्चेबाजासहित नयाँ वर्षको स्वागत गरिएको छ । यस्तै, काठमाडौं र भक्तपुरका पर्यटकीय क्षेत्रमा पनि विशेष कार्यक्रम भइरहेका छन् ।
प्रायः विदेशी पर्यटकले भरिभराउ हुने काठमाडौंको ठमेलमा अहिले स्वदेशी पर्यटकको चहलपहल बढेको छ । यसपालि नयाँ वर्ष र शनिवारको बिदा लगातार परेकाले पनि विभिन्न ठाउँमा घुम्न जानेहरुको सङ्ख्या बढेको छ । कोभिड महामारीका कारण सुस्ताएका बेला आन्तरिक र बाह्य पर्यटकको चहलपहल बढ्दा पर्यटन व्यवसायी उत्साहित भएका छन् ।