काठमाडौं- नेपाल र नेपालबाहिर छरिएर रहेका कराँतेका खेलाडीको पुनर्मिलन गराउने उद्देश्यले अमेरिकामा यूएस-नेपाल कराँते एसोसिएसन अफ अमेरिका स्थापना भएको छ। ‘क्लोज क्याम्प’मार्फत खेलाडीको कला र कौशल विकास गराउने संस्थाको उद्देश्य छ।
अमेरिकामा अवकाश प्राप्त जीवन बिताइरहेका नेपालमा कराँते खेलका संस्थापक प्रमुख थानेश्वर राईको नेतृत्वमा उक्त संस्था दर्ता भएको हो। अमेरिकास्थित भरमन्ट राज्यमा मुख्यालय रहने गरी दर्ता भएको एसोसिएसनको सचिवमा डीबी राउत छन्। गत ३ भदौमा भरमन्ट राज्यको सचिवालयमा गैरनाफामूलक निगमका रूपमा संस्था दर्ता भएको थानेश्वर राईले जानकारी दिए।
नेपालमा लामो समयसम्म कराँतेको प्रमुख हुँदै प्रमुख प्रशिक्षकबाट अवकाश भएपछि अमेरिकामा रहेका राईले बाँकी जीवन विश्वभर छरिएर रहेका कराँते खेलाडीहरू एउटै छातामुनि समेट्ने, उनीहरूलाई संगठित गरी ‘क्लोज क्याम्प’ सञ्चालन गर्नेदेखि प्रतियोगितासमेत आयोजना गरिने लक्ष्य राखिएको जनाइएको छ।
