मड्रिड- एक नयाँ अध्ययनले तीन हजार वर्षअघि नै स्पेनका बासिन्दाले लागूपदार्थ (ड्रग्स) सेवन गर्ने गरेको देखाएको छ।
मनोद्विपक पदार्थ मानिसले सेवन गर्ने गरेको शायद यो सबैभन्दा पुरानो उदाहरण हुन सक्छ। वैज्ञानिकहरूका अनुसार मिनार्कोस्थित एक चिहानमा फेला परेका केशबाट यसको पुष्टि भएको हो।
प्राचीन मानव सभ्यताहरूमा रुख, बुट्यान र झाडीबाट प्राप्त हुने औषधिलाई ड्रग्सको रूपमा सेवन गर्ने गरिएको अनुमान वैज्ञानिकहरूको छ। यो युरोपमा ड्रग्सको सेवन गर्ने गरिएको सबैभन्दा पुरानो प्रत्यक्ष प्रमाण रहेको उनीहरूको भनाइ छ।
जर्नल साइन्टिफिक रिपोर्टमा प्रकाशित शोधअनुसार मिनार्कोको दक्षिण-पश्चिमी इलाकास्थित ईएस क्यारिट्स गुफामा प्राचीन मानव गतिविधि फेला परेको हो। उक्त गुफामा २०० भन्दा अधिक मानव चिहान फेला परेका छन्। उक्त क्षेत्र ८०० ईसापूर्वसम्म करिब ६०० वर्षसम्म कुनै अनुष्ठान र अन्त्येष्टी स्थलका रूपमा प्रयोग हुने गरेको अनुमान छ।
शोधकर्ताहरूका अनुसार जुन पदार्थहरूमा काफी मजबुत हुने क्षमता थियो, तिनको उपयोग गुफामा आयोजित अनुष्ठानहरूमा हिस्साका रूपमा गरिन्थ्यो। तिनमा धामी, झाँक्रीहरू सहभागी हुन्थे। उनीहरू रुख, बुट्यानका औषधिहरूको दुष्प्रभावलाई नियन्त्रित गर्न सक्षम मानिन्थे।
यो खोजीमा वैज्ञानिकहरूले एट्रापिन, स्कोपोलामाइन, एफेड्रिनजस्ता मनोद्विपक पदार्थ पनि उक्त गुफामा फेला पारेका छन्। ती पदार्थले ऊर्जा र सतर्कता बढाउने अनुमान छ।
