वासिङ्टन- जेम्सवेब स्पेस टेलिस्कोपले अहिलेसम्म देख्न नसकिएका चारवटा आकाशगंगाहरूका विवरण लिएको छ। यी आकाशंगाहरू धर्तिबाट अहिलेसम्म देख्न सकिएको थिएन।
ती आकाशगंगाहरू बिगब्याङको करिब ३२ करोड वर्षपछि निर्माण भएको खगोलविदहरूको अनुमान छ। त्यतिबेला ब्रह्माण्ड आफैं प्रारम्भिक चरणमै थियो।
जेम्सवेब टेलिस्कोप गत वर्षदेखि सञ्चालनमा आएको छ, जसले वैज्ञानिक खोजीमा एउटा धार नै बदलिदिएको छ। उक्त टेलिस्कोपले हालसम्मकै सबैभन्दा टाढाका वस्तुको विवरण संकलन गरिरहेको छ। हालसम्मकै सर्वाधिक टाढाका वस्तुको विवरण यसले संकलन गरिरहेको छ।
जबसम्म सबैभन्दा टाढाका आकाशगंगाको प्रकाश पृथ्वीसम्म आइपुग्छ, त्यतिन्जेलमा ब्रह्माण्ड अझ बढी विस्तारित भइसकेको हुन्छ। र, प्रकाश स्पेक्ट्रमको इन्फ्रारेड क्षेत्रमा स्थानान्तरित हुन्छ। वेब टेलिस्कोपको ‘एनआईआर क्याम’ उपकरणमा ती प्रकाश पत्ता लगाउने अभूतपूर्व क्षमता छ। त्यसबाट खगोलविदहरूलाई ब्रह्माण्डबारे थप खोजी गर्न मद्दत पुगिरहेको छ।
नेचर एस्ट्रोनोमी जर्नलमा प्रकाशित दुई अध्ययनअनुसार खगोलविदहरूले ती चारवटा आकाशगंगा देखेका छन्। र, तिनको दृश्य स्पष्ट ढंगबाट देखिएको छ। १३ अर्ब वर्षअघि पहिलो बिगब्याङको ३०० देखि ४०० मिलियन वर्षपछि आकाशगंगाहरू बन्न थालेको अनुमान छ।
एस्ट्रोफिजिक्स इन्स्टिच्युट अफ पेरिसका शोधकर्ता तथा यी दुई अध्ययनमा सहभागी स्टिफन चार्लोटका अनुसार यी चार आकाशगंगालाई ‘जेडईएस-जीएस-जेड १३-०’ नाम दिइएको छ। र, यी बिगब्याङको ३२ करोड वर्षपछि बनेको अनुमान छ। र, अहिलेसम्म खगोलविदहरूले देखेका सबैभन्दा टाढाका वस्तु हुन् यी।
यो टेलिस्कोपले पनि ‘जेड्स-जीएस-जेड१०-०’ आकाशगंगाको अस्तित्व पुष्टि गरेको छ, जो हब्बल टेलिकोस्पले देखेको थियो। यो आकाश गंगा बिगब्याङको ४५ करोड वर्षपछि निर्माण भएको अनुमान छ।
चार्लोटका अनुसार यी चारवटा आकाशगंगाको द्रव्यमान साह्रै कमजोर छ। यिनीहरूको वजन करिब एक सय मिलियन सौर्य द्रव्यमान मात्र छ। हाम्रो आकाशगंगाको वजन १.५ ट्रिलियन सौर्य द्रव्यमान बराबर भएको अनुमान छ।
तथापि, आकाशगंगाहरू आफ्नो अनुपातमा ताराहरूको निर्माणमा सक्रिय देखिन्छन्। यसअघि गत फेब्रुअरीमा खगोलविदहरूले पत्ता लगाएका ६ वटा विशाल आकाशगंगाहरूको खोजीले हालसम्म मानकमाथि नै प्रश्न खडा गरेको थियो। र, अन्तरिक्ष अध्ययनमा हालसम्मको मानक मोडलमा परिवर्तनको आवश्यकता देखिएको थियो।
येल विश्वविद्यालयका खगोलशास्त्री पिटर ब्यान डोक्कमको भनाइमा यी आकाशगंगाहरूको खोजी अघिसम्म ब्रह्माण्डको करिब ३०० मिलियन वर्षको अस्पष्ट इतिहास थियो। र, अब जेम्स वेब टेलिस्कोपले बिगब्याङको नजिकसम्मको खोजी गर्ने आशा पलाएको छ।
