काठमाडौँ – शनिबार काठमाडौंको टुँडिखेलमा ब्याण्डलाई सुन्न सयौं दर्शक उपस्थित भएका थिए । नेपाली रक ब्याण्ड १९७४ एडी यतिबेला देश–विदेशको सांगीतिक दौडाहामा व्यस्त छ।

काठमाडौं महानगरपालिका र अटिजम केयर नेपाल सोसाइटीले सहकार्य गरेका थिए। ‘इम्ब्रेस अटिजम’ भने स्लोगनसहित आयोजित कन्सर्टमा हिट ट्रयाकहरु गुञ्जिए र दर्शकले हिउँदे झरीले केही चिसिएको काठमाडौंमा रकगीतसँगै मनोरञ्जन लिए।

कन्सर्टमा काठमाडौं महानगरकी उपमेयर सुनिता डंगोलदेखि अष्ट्रेलियाली राजदूत फेलिसिटी भल्कसम्म सहभागी भए। लेखकसमेत रहेकी राजदूत भल्क ब्याण्डका गीतहरुमा झुमेकी थिइन्।

ब्याण्डले अटिजम सचेतनाको महत्वपूर्ण विषयसँग जोडिएर सांगीतिक प्रस्तुति दिन पाउँदा खुसी लागेको बताएको छ। ‘अटिजमले बोलेको छ र हामीले सुन्ने बेला आएको छ,’ कन्सर्टअघि ब्याण्डद्वारा जारी वक्तव्यमा उल्लेख छ।