काठमाडौँ – हास्य कलाकार जीतु नेपालको कमेडी शो ‘मुन्द्रेको कमेडी क्लब’ आजदेखि कान्तिपुर टेलिभिजनबाट प्रसारणमा आउने भएको छ । कोरोना भाइरसको दोस्रो भेरियन्ट बढेसँगै बन्द भएको शो आजबाट फेरि नियमित प्रसारण सुरु हुने भएको हो ।
हास्य कलाकार नेपालले शोको पहिलो अतिथिको रुपमा अभिनेता प्रदीप खड्कालाई लिएका छन् । सामाजिक संजालमा शो सुटिङको एक तस्बिर पोष्ट गर्दै उनले सल्लाह र सुझावको अपेक्षा गरेको बताएका छन् ।
शो जीतुले ‘कि एडभटाइजिङ’सँगै मिलेर निर्माण गरेका हुन् । शोको यो नयाँ सिजनको अध्यक्षमा अभिनेत्री प्रियंका कार्की रहेकी छन् । यसअघि शोको अध्यक्षमा दीपाश्री निरौला र त्यसपछि करिश्मा मानन्धर रहेका थिए ।
अब सुरु हुने शोमा अध्यक्ष मात्र नभएर केही कलाकार समेत नयाँ हुनेछन् । जसमा दमन रुपाखेती, श्याम राना, दिनेश काफ्ले, राजेन्द्र नेपाली ‘लट्टे’, प्रभात लामा र एलिना बास्कोटा ‘सान्नानी’ रहेका छन् ।