काठमाडौं । सुनसरीको बराहक्षेत्र नगरपालिका–२ स्थित चतरा अस्पतालमा कार्यरत ४ जना चिकित्सकले सामूहिक राजीनामा दिएका छन् । राजीनामा दिनेमा अस्पतालका विशेषज्ञ चिकित्सक विष्णु भण्डारी, मेडिकल अधिकृत विवेक बर्मा, विकास दास र सुरज थापा मगर छन्।
बुधबार आमालाई फलोअप उपचारका लागि ल्याएका एक व्यक्तिले ड्युटी मै रहेका चिकित्सक विवेक बर्मा, विकास दास माथि दुर्व्यवहार गरेका थिए ।
गलत औषधि लेखि दिएको भन्दै ओपिडी कार्यरत रहेका चिकित्सकलाई आएर तथानाम गाली तथा दुर्व्यवहार गरेको आरोप चिकित्सक बर्माले लगाए। आरोपित व्यक्तिले भनेजस्तो गलत औषधि नलेखिएको चिकित्सकको दाबी छ।
अस्पतालमा ठूलो–ठूलो स्वरमा हल्ला भएपछि बुझ्न आएका अन्य चिकित्सक र स्वास्थ्यकर्मीलाई समेत ती व्यक्तिले दुर्व्यवहार गरेको आरोप स्वास्थ्यकर्मीको छ ।
साथै, घटनालाई अस्पताल व्यवस्थापन र बराह क्षेत्र नगरपालिकाका मेयर रमेश कार्की, वडा नं २ अध्यक्ष होम प्रसाद गौतम लगायतले सामान्य ठानेर दोषीलाई उन्मुक्ति दिएको उनीहरूले बताए।
आफू डिउटिमै कार्यरत रहँदा बिरामीको आफन्तबाट असुरक्षित महसुस गरेको भन्दै संयुक्त रूपमा राजीनामा दिएका हुन्।
चिकित्सकहरूले संयुक्त रूपमा राजीनामा दिए पछि अहिले इमेरजेन्सि तथा ओपिडी चिकित्सक विहीन बनेको छ।स्थानीय बासिन्दा डम्बर कार्की भन्छिन्,‘अहिले इमेरजेन्सि चिकित्सक विहीन भएको अवस्थामा बिरामीले समयमा उपचार नपाएर अकालमै मृत्यु भएमा यसको जिम्मेवारी कसले लिने?’
