साओपाउलो– ब्राजिलका महान् फुटबलर पेलेका परिवारका सदस्य यहाँस्थित अल्बर्ट आइन्स्टाइन अस्पतालमा भेला भएका छन्।
गत नोभेम्बर अन्त्यदेखि विश्वविख्यात ८२ वर्षीय पूर्वखेलाडी क्यान्सरसँग संघर्षरत छन्।
चिकित्सकहरूले गत साताको प्रारम्भमा तीनपटक पेलेको क्यान्सर बढेको तथा मिर्गाैला र मुटुसँग सम्बन्धित समस्याबाट पीडित भएको जनाएका छन्। उनी चिकित्सकको उच्च रेखदेखमा छन्। त्यसपछि उनको स्वास्थ्यस्थितिबारे अस्पतालले केही बताएको छैन।
पेलेका छोरा एडिन्हो भनेर चिनिने एड्सन चोल्बी नासिमेन्टो पनि अस्पताल आइपुगेका छन्। दक्षिणी ब्राजिलको एक फुटबल क्लबका लागि काम गर्ने एडिन्होले डाक्टरहरूले मात्र आफ्नो बुवालाई मद्दत गर्न सक्ने बताए। पेलेकी छोरी केली नासिमेन्टोले आफ्ना बाबुको समीप आफू र एडिन्हा बसेको फोटो इन्स्टाग्राममा पोस्ट गरेकी छन्। त्यसको केही घण्टापछि सान्तोसका पूर्वगोलकिपर एडिन्होले आफ्नो बुबाको हात समातेको फोटो राखेर ‘बुवा, मेरो बल तपाईंको हो’ लेखेका छन्।
विश्वभर पेले भनेर चिनिने एडसन एरान्टेस डो नासिमेन्टोको सेप्टेम्बर २०२१ मा ‘कोलोन ट्युमर’ हटाइएपछि त्यो शरीरका अन्य अंगमा फैलियो वा फैलिएन भन्नेबारेमा परिवारका सदस्य र अस्पतालले केही जानकारी दिएका छैनन्।