कोलम्बो- आर्थिक अनुशासन कायम गर्न नसक्दा टाट पल्टिएको श्रीलंकाको अर्थतन्त्रमा केही सुधार देखिएको छ। बितेका २० दिनमा ५० हजारभन्दा बढी विदेशी पर्यटकले टापु मुलुकको भ्रमण गरेका छन्।
विदेशी मुद्रा आर्जनको प्रमुख स्रोत पर्यटन क्षेत्रमा भएको यो सुधार अघिल्लो महिनाको तुलनामा अधिक देखिएको त्यहाँको पर्यटन विकास प्राधिकरणले बताएको छ। पर्यटकको औसत आगमन दुई हजार ५०० भन्दा बढी रहेको तथा यो वर्षको पहिलो ११ महिनामा एक हजार ९०० को हाराहारीमा रहेको प्राधिकरणले जनाएको छ।
अघिल्लो वर्ष ६ लाख ७८ हजार ३९२ जना विदेशी पर्यटकले श्रीलंका भ्रमण गरेका थिए।
कोभिड–१९ महामारीसँगै आर्थिक र राजनीतिक संकटले जकडिएको देशको अर्थतन्त्रलाई उजिल्याउन गठित वर्तमान सरकारले आगामी वर्ष १५ लाख र अर्को वर्ष ३० लाख पर्यटक भित्र्याउने लक्ष्य लिएको पर्यटन तथा भूमिमन्त्री हरिन फर्नान्डोले बताए।