काठमाडौं- राष्ट्रपति विद्यादेवी भण्डारीले नयाँ सरकार गठनका लागि दलहरूलाई आह्वान गरेकी छन्।

निर्वाचन आयोगले बुझाएको आम निर्वाचन २०७९ को प्रतिवेदन अध्ययनपछि राष्ट्रपति भण्डारीले नयाँ प्रधानमन्त्रीमा दाबी पेश गर्न आह्वान गरेकी हुन्।

उनले कुनै दलको स्पष्ट बहुमत नदेखिएकाले संविधानको धारा ७६ (२) अनुसार प्रतिनिधिसभामा प्रतिनिधित्व गर्ने दुई वा दुईभन्दा बढी दलहरूको समर्थनमा बहुमत प्राप्त गर्न सक्ने प्रतिनिधिसभाको सदस्यलाई प्रधानमन्त्रीमा दाबी पेश गर्न आह्वान गरेकी हुन्।

उनले दलहरूलाई सात दिनको समय दिएकी छन्। बहुमत पुर्‍याउने सांसदले आगामी आइतबार पाँच बजेभित्र दाबी पेश गर्नुपर्ने समयसीमा दिएकी छन्।