बर्लिन : बर्लिनमा शुक्रबार रेडिसन ब्लु होटलको एक विशाल एक्वेरियम विस्फोट भई भल बग्दा करिब एक हजार ५०० उष्णकटिबंधीय माछा होटल परिसर र नजिकैको छरप्रस्ट भएपछि पानीको अभावमा ती सबै माछा मरेका छन्।
स्थानीय समयअनुसार बिहान ५ः५० बजे १४ मिटर अग्लो बेलना आकारको एक्वेरियम विस्फोट हुनुको कारण खुल्न नसकेको प्रहरीले जनाएको छ।
बर्लिनको अग्नि नियन्त्रक विभागका प्रवक्ताले एएफपीसँग भने, ‘एक्वेरियम रहेको होटल परिसरको भुइँतलामा रहेको १० लाख लिटर पानी र भित्रका सबै माछा बगेर मरेका छन्।’
होटलका अतिथिहरूले ठूलो धमाका र सानो भूकम्प गएजस्तो आवाजपछि आफूहरू ब्यूँझिएको रिपोर्ट गरेका छन्।
सिसाको छर्राबाट दुई जनालाई हल्का चोट लागेको र उनीहरुलाई अस्पताल लगिएको र सबै माछा मरेको बताइएको छ।
बर्लिनका मेयर फ्रान्जिस्का गिफीले भने, ‘यो पूर्ण सुनामीजस्तै थियो।’ भाग्यबस यो घटना बिहानै भएको थियो र निकै थोरै मानिस मात्र घटनास्थल वरपर थिए।
उनले भने, ‘हामीले देखेको भयानक विनाशको बावजुद संयोगबस मानिसहरू गम्भीर घाइते भएका छैनन्।’ उनले पत्रकारहरूसँग भने। ट्याङ्कीमा रहेका एक हजार ५०० माछालाई भने बचाउन नसकिएको गिफीले बताए।
घटनास्थलमा तत्काल १०० भन्दा बढी आपतकालीन कर्मचारीहरू पुग्दा घटनास्थल सिसा र अन्य भग्नावशेषले छरपष्ट थियो।
बेलना आकारको उक्त विशाल एक्वेरियम लामो समयदेखि बर्लिनमा एक लोकप्रिय पर्यटक आकर्षणका रूपमा रहेको थियो।
सी लाइफ वेबसाइटका अनुसार, एक्वेरियम विश्वको सबैभन्दा ठूलो बेलना आकार (फ्रीस्ट्यान्डिङ एक्वैरियम) हो।
होटलकी अतिथि क्लाउडिया गोन्जालेसले एक्वेरियम फुट्दा आफू ओछ्यानबाट लडेको बताए। उनले एएफपीसँग भने, ‘उक्त समय आतिशबाजीको जस्तो आवाज आएको थियो र होटल भित्रभित्रै हल्लिएको थियो।’
होटल वरपरको क्षेत्र दिउँसोसम्म सिल गरिएको थियो।
पानीको बाढीले झ्याल र ढोका हरू भत्काएर होटल बाहिरको गल्लीमा कुर्सी, टेबुल र साना विरूवाका गमलाहरू लडाएको थियो। होटेलमा बस्ने पाहुनाहरूबाट अनलाइनमा प्रसारित तस्वीरहरू र भिडियोहरूमा पारदर्शी एक्वेरियममा व्यापक क्षति भएको देखिन्छ। त्यहाँ केवल फ्रेम मात्र देखिन्छ।