धरान- धरान उपमहानगरपालिका-१३ की ४२ वर्षीया महिला उषा राईको हत्यामा संलग्न चारजनालार्ई प्रहरीले पक्राउ गरी सार्वजनिक गरेको छ।
पक्राउ परेका चारैजनालाई मंगलबार इलाका प्रहरी कार्यालय धरानले पत्रकार सम्मेलन गरेर सार्वजनिक गरेको हो। मृतकका भाइ सुन्दर राईले किटानी जाहेरी दिएको आधारमा उनीहरूलाई पक्राउ गरिएको डीएसपी बुद्ध श्रेष्ठले जानकारी दिए।
पक्राउ पर्नेमा घटनाका मुख्य आरोपी धरान–१३ सूर्यमार्गकी ५५ वर्षीया उर्मिला राई छिन्। उनलाई १५ मंसिरमा पक्राउ गरिएको र १० दिनको म्याद थप गरिएको डीएसपी श्रेष्ठले जानकारी दिए।
यस्तै, १६ मंसिरमा २६ वर्षीया सुमित्रा राई र धरान–१७ की २९ वर्षीया सुसेली राईलाई पक्राउ गरेर अदालतबाट ९ दिनको म्याद थप भएको प्रहरीले जनाएको छ। ४० वर्षीया रत्ना लिम्बू सुब्बालाई पनि १८ मंसिरमा पक्राउ गरेर ७ दिनको म्याद थप गरिएको छ।
घटनामा सिर्जना राई, मीना राई र निरकुमारी गुरुङको पनि संलग्नता भएको भन्दै जाहेरी परेकोले उनीहरूको खोजी भइरहेको प्रहरीले जनाएको छ। मीना राई भने को हुन् भन्ने खुल्न नसकेको पनि डीएसपी श्रेष्ठले बताए।
हत्यामा संलग्न मुख्य अभियुक्त उर्मिलाले आफना श्रीमान् गोविन्द राईसँग उषाको सम्बन्ध रहेको भन्दै स्थानीय जनजागृती आमा समूहका सदस्यहरूलाई बोलाएर कुटपिट गर्दा उषा गम्भीर घाइते भएकी थिइन्। उनको उपचारका क्रममा १३ मंसिरमा मृत्यु भएको थियो।