काठमाडौं- व्यस्त व्यावसायिक केन्द्र इन्द्रचोकमा आइतबार बिहान ग्याङ फाइट भएको छ।

बिहान साढे ११ बजेतिर भएको घटनामा दुई चिनियाँ गम्भीर घाइते भएका छन्।

तीनजना चिनियाँ नागरिकबीच भएको विवाद बढ्दै गएपछि ३७ वर्षीय फङ चङयुनले धारिलो वस्तु प्रहार गरी आफ्ना दुई साथीलाई घाइते बनाएका हुन्।

लि चुवान र गान साउसिङलाई वीर अस्पतालको राष्ट्रिय ट्रमा सेन्टरमा भर्ना गरिएको छ।

३२ वर्षीय लि चुवानको पेटमा गहिरो चोट लागेको छ। उनी बोल्न नसक्ने अवस्थामा छन्। गान साउसिङको पेट, छाती र टाउकोमा चोट लागेको प्रहरीले जनाएको छ। उनी पनि बोल्न सक्ने अवस्थामा छैनन्।

चक्कु प्रहार गर्ने फङ चङयुनलाई हतियारसहित न्यूरोडस्थित जनसेवा प्रहरी कार्यालयले पक्राउ गरी अनुसन्धान अगाडि बढाएको छ।