काठमाडौं- प्रतिनिधिसभा र प्रदेशसभा निर्वाचनमा अप्रत्यासित मत ल्याएर चर्चामा रहेको रवि लामिछाने नेतृत्वको राष्ट्रिय स्वतन्त्र पार्टीको मकवानपुर जिल्ला समितिमा विवाद चर्केको छ।

जिल्ला सभापति राजकुमार न्यौपानेलाई हटाउन माग गर्दै २४० सदस्यले केन्द्रीय कार्यालयमा ज्ञापनपत्र पठाएका छन्।

४ मंसिरको चुनावमा न्यौपानेले आफ्ना उम्मेदवारलाई अन्तर्घात गरेको आरोप लागेको छ। सोही आरोपमा न्यौपानेलाई पदमुक्त गर्न ती सदस्यहरूले माग गरेका छन्।

समानुपातिक उम्मेदवारलाई विपक्षी दलका उम्मेदवारको घरमै लगेर न्यौपानेले भेट गराएको आरोप ती सदस्यहरूको छ।

न्यौपानेले भने आफूविरुद्ध गुटबन्दी भएको दाबी गरेका छन्। पार्टीले राष्ट्रिय दलको हैसियत पाएसँगै जिल्लामा आफूलाई हटाउन चलखेल भएको उनको दाबी छ। र, चुनावी रणनीतिअनुसार नै आफूले विपक्ष दलका उम्मेदवारलाई भेटेको बताएका छन्।