काठमाडाैं, असाेज २८ : नेपाली कांग्रेसको कार्यसम्पादन समितिको बैठकमा निर्वाचनको घोषणापत्रको मस्यौदामाथि छलफल भएकाे छ। पार्टी कार्यालय सानेपामा बसेकाे बैठकमा महामन्त्री विश्वप्रकाश शर्मा नेतृत्वको घोषणा तयारी समितिले घोषणापत्रको मस्यौदा प्रस्तुत गरेका छन्।
बैठकमा प्रारम्भिक मस्यौदा उपसमितिका तर्फबाट डा. स्वर्णिम वाग्लेले मस्यौदाको थप व्याख्या गरेका थिए भने बैठकमा प्रारम्भिक मस्यौदा समितिका सदस्यहरुको पनि आमन्त्रित रुपमा सहभागिता थियो।
बैठकमा प्रधानमन्त्री शेरबहादुर देउवासहितका नेताहरु सहभागी थिए। निर्वाचन आयोगले प्रत्यक्ष र समानुपातिकतर्फको उम्मेदवारको अन्तिम नामावली प्रकाशन गरेपछि कांग्रेस घोषणापत्रलाई पूर्णता दिन लागिपरेको हो ।
बैठकले प्रारम्भिक मस्यौदालाई प्राप्त सुझावहरु समावेश गर्ने गरि पारित गरेको छ । उपत्यका बाहिर रहेका केन्द्रीय कार्यसमितिका पदाधिकारी एवं सदस्यहरुले असोज २९ गते शनिबार साँझ ७ बजेभित्र पठाउने लिखित सुझाव समेतलाई समावेश गर्ने निर्णय बैठकले गरेको छ ।
बैठकमा उपसभापति पूर्णबहादुर खड्का, महामन्त्री गगनकुमार थापा, केन्द्रीय सदस्यहरु गोपालमान श्रेष्ठ, विमलेन्द्र निधि, डा. रामशरण महत, अर्जुननरसिंह के.सी., प्रवक्ता डा. प्रकाशशरण महत, उमा रेग्मी र जीपछिरिङ लामाले आफ्नो धारणा राखेका थिए।