काठमाडौं- एकीकृत समाजवादीका केन्द्रीय प्रवक्ता जगन्नाथ खतिवडाविरुद्ध कांग्रेस क्षेत्रीय सभापति नै बागी बनेका छन्।
कांग्रेस क्षेत्रीय सभापति रामकुमार राई बागी बनेपछि खतिवडालाई चुनौति थपिएको छ। उदयपुर क्षेत्र नम्बर २ को चुनावी प्रतिस्पर्धा एमालेको पोल्टामा पर्छ कि खतिवडाले बाजि मार्छन्, भन्न कठिन छ।
किनकि, राईले गठबन्धनको ३-४ हजार मत प्रभावित बनाउन सक्छन्। खतिवडा गठबन्धनका साझा उम्मेदवार हुन्। तर, गठबन्धनकै प्रभावशाली घटक कांग्रेसले आफ्ना क्षेत्रीय सभापतिलाई नै बागी बन्नबाट रोक्न नसकेपछि खतिवडालाई सकस भएको हो।
यो क्षेत्रमा माओवादी नेता सुरेश राई प्रतिनिधिसभामा दोहोरिन चाहन्थे। तर, गठबन्धनको बाँडफाँटमा यो क्षेत्र एकीकृत समाजवादीको भागमा पर्यो। आफ्नो टिकट खोसिएपछि निवर्तमान सांसद राईले उकासेर कांग्रेस क्षेत्रीय सभापति रामकुमारलाई बागी बनाएको आशंका एकीकृत समाजवादीका नेता-कार्यकर्ताको देखिन्छ। निवर्तमान सांसद राई चुनावी अभियानमा नलागी निष्क्रिय बसेका छन्।
यो क्षेत्रमा कुल मत ९३ हजार छ। एमाले करिब ९ हजार मतले पछाडि रहेको आकलन छ। एमालेको संगठन निर्माणमा पनि मुख्य भुमिका रहेका कारण पनि खतिवडाले एमालेको प्रशस्त मत ल्याउन सक्ने अनुमान छ।