कप्तान ह्यारी केनको एक मात्र गोलमा टोटनहमले शनिबार इङलिस प्रिमियर लिगमा ब्राइटनमाथि १-० को जित निकालेको छ ।
गत साता लन्डन डर्बीमा टोटनहम शीर्ष स्थानको आर्सनलसँग पराजित भएको थियो । टोटनहमले ब्राइटनविरुद्धको जितसँगै तीन अंक पक्का गर्यो । तर फिटनेस प्रशिक्षक जियान पिइरो भेन्ट्रोनको निधनले भने टोटनहमको जित खल्लो बनेको थियो ।
यता ब्राइटनका प्रशिक्षक रोबर्टो डी जर्बीको घरेलु मैदानमा जितका साथ कार्यकालको सुखद सुरुआत गर्ने लक्ष्यले पनि पूर्णता पाएन । डी जर्बीको प्रशिक्षणमा घरेलु मैदान अर्मेक्स स्टेडियममा ब्राइटनको यो पहिलो खेल थियो ।
टोटनहमका प्रशिक्षक एन्टोनीयो कोन्टेले ब्राइटनविरुद्ध ३-५-२ को संरचनामा टोली उतार्दा म्याट डोहेर्टी र याभिस बिसौमाले सुरुआती रोजाईमा अवसर पाएका थिए ।
२२औं मिनेटमा केनले गरेको गोल टोटनहमको जितमा पर्याप्त बन्यो ।
टोटनहम नौ खेलमा २० अंकसहित तेस्रो स्थानमा छ । जुन समान खेल खेल्दै दोस्रो स्थानमा बसेको म्यानचेस्टर सिटी भन्दा एक अंक कम हो । शीर्ष स्थानको आर्सनलको आठ खेलमा २३ अंक छ ।
यसअघि शनिबारै सम्पन्न अन्य खेलमा म्यानचेस्टर सिटीले साउथहमटनलाई ४–० ले हराउँदा चेल्सीले उल्भरहमटनलाई ३–० ले पराजित गर्यो ।