च्याम्पियन्स लिगअन्तर्गत समूह सी मा बार्सिलोना इन्टरसँग १-० ले पराजित भएको हो । सो खेलमा बार्सिलोनाले गरेको एक गोलले मान्यता पाएन भने इन्जुरी समयमा बार्सिलोनाले पेनाल्टीको अपिल गरे पनि भिएआरले त्यसलाई अस्विकृत गरेको थियो ।

पहिलो हाफको इन्जुरी समयको दोस्रो मिनेटमा हकान चाल्हनोलुले गरेको गोलमा इन्टरले अग्रता लिएको थियो । ६६औं मिनेटमा पेड्रीको गोलमा बार्सिलोना खेलमा फर्किएको थियो । तर भिएआरमा अंशु फातीको ह्यान्ड भएको भन्दै सो गोललाई मान्यता दिएन ।

इन्जुरी समयमा बार्सिलोनाले पेनाल्टीको अवसर पाएको थियो । इन्टरका डेन्जल डम्फायर्सले पेनाल्टी बक्समा ह्यान्ड गरेको भन्दै बार्सिलोनाले पेनाल्टीको अपिल गरेको थियो । तर भिएआरले त्यसलाई अस्विकृत गरेको थियो ।

समूह ‘सी’ मा इन्टर ६ अंकसहित दोस्रो स्थानमा छ जुन शीर्ष स्थानको बायर्न म्यनिख भन्दा तीन अंक कम हो । बार्सिलोना भने तीन खेलमा तीन अंकसहित तेस्रो स्थानमा छ । भिक्टोरिया प्लिजेनले भने अंक खाता खोल्न सकेको छैन ।