सिडनी- वेस्ट इन्डिजका खेलाडी सिमरोन हेटमायर टी-२० विश्वकप क्रिकेटको टिमबाट बाहिरिनु परेको छ। त्यसको कारण अरू केही नभई फ्लाइट समात्न समयमै नपुग्नु हो।
उनलाई वेस्ट इन्डिजको क्रिकेट बोर्डले सर्वसम्मतिबाट टिमबाट निकालेको छ। उनले यसरी नै बारम्बार फ्लाइट मिस गरिरहेकाले टिमबाट बाहिर पठाइएको बोर्डले उल्लेख गरेको छ।
अस्ट्रेलिया जाने फ्लाइट उनले दोस्रोपटक छुटाएका थिए। गत शनिबार क्यारेबियन प्रिमियर लिगको समाप्तिपछि वेस्ट इन्डिजको टिम अलग-अलग समूहमा अस्ट्रेलिया उडेको थियो।
हेटमायरले १ अक्टोबरमा अस्ट्रेलिया उड्ने तय भएको थियो। तर, निजी कारण जनाउँदै फ्लाइट पछि सार्न लगाए। बोर्डले ३ अक्टोबरका लागि फ्लाइट बुक गरेको थियो। तर, त्यस दिन पनि उनले अस्ट्रेलिया जान नसक्ने जानकारी टिमका निर्देशक जिमी एडम्सलाई बताए।
त्यसपछि बोर्डले कठोर निर्णय लिँदै हेटमायरलाई टिमबाट बाहिरिने बाटो देखायो। र, समरा ब्रुक्सलाई टिममा सहभागी गर्न निर्णय लियो। त्यसको जानकारी अन्तर्राष्ट्रिय क्रिकेट काउन्सिल (आईसीसी)लाई पनि दिइएको छ।