वासिङटन- अमेरिकी अन्तरिक्ष एजेन्सी नासाको डार्ट यानलाई क्षुद्र ग्रहसँग ठोक्काउन सफलता मिलेको छ।
डार्टको मतलब हुन्छ, डबल एस्टोरोइड रिडाइरेक्सन टेस्ट। अर्थात्, पृथ्वीमा ठोक्किन तीव्र गतिमा अगाडि बढेका क्षुद्र ग्रहमाथि टक्कर सिर्जना गरेर तिनको मार्ग बदल्नु।
डिमोरफोस नाम दिइएको क्षुद्र ग्रहमा ठोक्किएर नासाको डार्ट अन्तरिक्ष यान ध्वस्त भएको छ। यो टकराव जानाजान गराइएको हो। त्यसको उद्देश्य पृथ्वीतर्फ आउने क्षुद्र ग्रह या अन्तरिक्षबाट पृथ्वीमा ठोक्किन आइपुग्ने ढुंगालाई तिनको मार्गबाट हटाउन कसरी सकिन्छ भन्ने वैज्ञानिकको प्रयास हो।
डार्ट यानमा जडित क्यामेराले टार्गेटमाथि बज्रिनु अघिसम्म प्रतिसेकेन्ड तस्बिर पठाएको थियो। यसबाट केही साताभित्रै त्यसरी पृथ्वीमा बज्रिन आइपुग्ने क्षुद्र ग्रह र ढुंगालाई तिनको मार्गबाट हटाउन सकिने सिद्ध भएको छ।
डिमोरफोस र उसकै नजिक घुमिरहेको डिडिमास नाम दिइएको क्षुद्र ग्रहमाथि वैज्ञानिकहरूले नजर राखेका छन्। यी दुवै क्षुद्र ग्रहमाथि दुई दर्जनभन्दा बढी टेलिस्कोपको दिशा सोझिएको छ।
डार्ट मिसनको गति २२ हजार किलोमिटर प्रतिघण्टा थियो। क्षुद्र ग्रहमा ठोक्किनुअघि डार्ट मिसनमा जडित नेभिगेसन प्रणालीले टक्कर सुनिश्चित गर्न थ्रस्टर फायरिङ गरेको थियो।
डिमोरफोसको आकारको कुनै पनि वस्तु धर्तिमा बजारिँदा करिब एक किलोमिटरको गोलाकार १०० मिटर गहिरो खाडल बन्न सक्छ। त्यसबाट हुने नोक्सानी भिषण हुन्छ। सोही कारण वैज्ञानिकहरू अन्तरिक्षमा रहेका यस्ता चट्टानहरू नष्ट गर्ने अभियानमा लागि परेका छन्। र, नष्ट गर्न नसकिने चट्टानलाई तिनको मार्ग बदल्नेबारे खोज गरिरहेका छन्।