काठमाडौं- गोरखाको मनास्लु हिमालमा गएको हिमपहिरोमा घाइते एकजनाको मृत्यु भएको छ।

हिम पहिरोमा घाइते भएका चार जनामध्ये दुईजनाको उद्धार गरी हेलिकोप्टरबाट काठमाडौं ल्याइएको छ। थप दुई जनाको उद्धारका लागि हेलिकप्टर बेसक्याम्पमै तयारी अवस्थामा रहेको पर्यटन विभागकी लियाजन अफिसर यशोदा अर्यालले जानकारी दिइन्।

बेसक्याम्पबाट उद्धार गरेर सामागाउँ ल्याउन सिम्रिक एयर र त्यहाँबाट काठमाडौं ल्याउन कैलाश एयरको हेलिकोप्टर प्रयोग गरिएको छ।

८ हजार १६३ मिटर अग्लो मनास्लु हिमालको ३ र ४ नम्बर बेसक्याम्पको बीचमा सोमबार बिहान साढे ११ बजेतिर हिमपहिरो गएको थियो। यो क्षेत्र करिब ६ हजार ८०० मिटर उचाइमा पर्छ।

माथिल्लो बेसक्याम्पका लागि सामान ओसार्दै गरेका १३ जना हिमपहिरोमा परेका थिए। अर्यालका अनुसार मनास्लु क्षेत्रको मौसम खराब छ। सोही कारण उद्धारमा कठिनाइ भएको छ।