जयपुर- राजस्थानका मुख्यमन्त्री अशोक गहलोत भारतीय राष्ट्रिय कंग्रेस (कंग्रेस–आई)को अध्यक्ष बन्ने सम्भावना बढेको छ। त्यससँगै उनले मुख्यमन्त्री पदबाट राजीनामा दिने सोच बनाएका छन्।
पार्टी ‘हाई कमान’ अर्थात अध्यक्ष सोनिया गान्धीको भरोसा हासिल गरेका गहलोत राष्ट्रिय अध्यक्षमा उम्मेदवार दर्ता गराउँदै छन्। र, उनी कंग्रेसको राष्ट्रिय अध्यक्ष बन्ने लगभग तय देखिएको छ।
आफूलाई पार्टीले पर्याप्त अवसर दिएको बताउँदै उनले जयपुरमा पत्रकारहरूसँग मुख्यमन्त्री पदबाट राजीनामा दिने संकेत गरेका छन्। त्यससँगै राजस्थानको मुख्यमन्त्रीका लागि नयाँ अनुहारको खोजी पनि भएको छ।
गान्धी परिवारको प्रयासका बावजुद कंग्रेसले जनस्तरमा राम्रो पकड जमाउन नसकेका कारण परिवारबाहिरका नेतालाई अध्यक्ष बनाउने तयारी सोनियाको देखिएको छ। सोही कारण गहलोतलाई राष्ट्रिय अध्यक्ष बनाउँदै राजस्थानमा नयाँ मुख्यमन्त्रीको खोजीका लागि आइतबार नै कंग्रेसका वरिष्ठ नेता मल्लिकार्जुन खड्गे जयपुर पुगेका छन्। उनको साथमा कंग्रेसका राजस्थान प्रमुख अजय माकन पनि छन्।
५० वर्षदेखि कंग्रेसको राजनीतिमा रहेका गहलोत ४० वर्षयता कुनै न कुनै संवैधानिक पदमा रहँदै आएका छन्। कहिले सांसद, तीनपटक केन्द्रीय मन्त्री, तीनपटक नै कंग्रेसको राजस्थान अध्यक्ष, पार्टीको केन्द्रीय महामन्त्री र तीनपटक राजस्थानका मुख्यमन्त्री बनिसकेका छन्, उनी।
राजस्थानमा कंग्रेसका दुई गुट छन्। मुख्यमन्त्री गहलोतको गुटको नेतृत्व उनकै विश्वास पात्र मन्त्री शान्ति धारिवालको छ। र, पूर्वउपमुख्यमन्त्री सचिन पाइलटले अर्को गुट चलाउँछन्। नयाँ मुख्यमन्त्रीका लागि दुवै नेताले अभ्यास थालेको देखिएको छ।
