काठमाडाैं : बूढानीलकण्ठ नगरपालिकाका विभिन्न सात स्थानमा ‘होमस्टे’ (घरबास सेवा) सञ्चालन गरिने भएको छ । आन्तरिक तथा बाह्य पर्यटक लोभ्याउन आकर्षण गर्न सम्भावित सात स्थानमा ‘होमस्टे’ सञ्चालन गर्ने नगरपालिकाले नीति लिएको हो ।
नगरले चालु आव २०७९/८० को नीति तथा कार्यक्रममा नगरभित्रका वडा नं १ तौलुङ, ३ ठूलोगाउँ, ५ स्थित डाँडागाउँ, चिसिनी, लिपिकोट, ११ जगडोल र वडा नं १३ मा रहेको चुनिखेललगायतका ठाउँमा ‘होमस्टे’ सञ्चालनका लागि स्थानीयलाई प्रोत्साहन गरिने उल्लेख छ ।
नगरपालिकाभित्र आन्तरिक तथा बाह्य पर्यटक भित्र्याउन र व्यवसाय प्रवद्र्धनमा टेवा पुर्याउन नगरले ‘होमस्टे’ सञ्चालनको योजना ल्याइएको नगर प्रमुख मीठाराम अधिकारीले बताए। उनले भने, ‘होमस्टे सेवा नगरभित्रका केही ठाउँमा सञ्चालनमा आएका छन् उहाँहरुलाई प्रोत्साहन गर्न र अन्य नयाँ स्थानमा सञ्चालन गरेर पर्यटक भित्र्याउन योजना अगाडि बढाएका हौँ ।’
बूढानीलकण्ठ सहरदेखि गाउँसम्म फैलिएको स्थानीय तह हो । यहाँका कतिपय ग्रामीण बस्तीमा ‘अर्गानिक’ (जैविक) उत्पादन पाइन्छ । ‘अर्गानिक’ परिकारको स्वादमा रम्ने र सहर नजिकैका गाउँघर घुम्नेको सङ्ख्या बढेको बुनपा–५ का वडासदस्य हेप्सिवा तामाङको भनाइ छ । नगरले ‘अर्गानिक’ को योजना अघि सार्दा यहाँ व्यवसाय सञ्चालन गर्ने व्यवसायी उत्साहित बनेका छन।
नगर उपप्रमुख अनिता लामाले सञ्चालनमा रहेका विभिन्न व्यवसाय प्रवद्र्धन गर्नका लागि योजना अघि सारिएको बताएका छन। उनले भने, ‘नगरभित्रका विभिन्न पर्यटकीयस्थलको प्रचार गर्न र रोजगारीको अवसर नगरभित्रै जुटाउन हामीले ‘होमस्टे’ अभियान अगाडि सारेका हौँ । “होमस्टे सञ्चालनमा आएपछि स्थानीयको आम्दानीमा थप सहयोग पुग्ने हामीले विश्वास लिएका छौँ ।’
डाँडागाउँ तथा चिसिनीलगायतका ‘होमस्टे’ पुगेपछि त्यहाँको चिसो मौसमसँगै काठमाडौँको मनोरम दृष्यावलोकन गर्न सकिन्छ । काठमाडौँको सुन्दरता हेर्दै सफा वातावरणमा विभिन्न लोकल खानेकुरासमेत पाइने हुँदा पर्यटकको आकर्षण बढ्न थालेको डाँडागाउँका ‘होमस्टे’ व्यवस्थापक दोर्जे तामाङको भनाइ छ ।
स्थानीयले सञ्चालन गर्ने ‘होमस्टे’ सेवा प्रवद्र्धनका लागि नगरपालिकालेसमेत योजना ल्याएपछि व्यवसायी उत्साहित भएका छन् । नगरले यस अभियान थालनी गर्ने भएपछि व्यवसायमा थप आम्दानी हुने विश्वास रहेको बूढानीलकण्ठ–५ डाँडागाउँमा होमस्टे सञ्चालन गर्दै आएकी देवकी तामाङ बताउछन।
सहरभित्रका ग्रामीण क्षेत्र भ्रमणमा जाने पर्यटकका लागि स्थानीय खाना परिकार, रहनसहनसहित घरघरमा खाने, बस्ने व्यवस्था ‘होमस्टे’ हो । यसलाई परम्परागत संस्कृतिको आधुनिक रुप पनि मान्न सकिन्छ ।