नवलपुर- पोल्ट्री उद्योगका लागि आवश्यक पर्ने सम्पूर्ण सामग्री उत्पादन गर्न नवलपुरमा उद्योग स्थापना गरिएको छ। नवलपरासी (बर्दघाट–सुस्तापूर्व)को देवचुली नगरपालिकास्थित दलदलेमा चार उद्यमीको आठ करोड रुपैयाँ लागतमा उद्योग स्थापना गरेका हुन्।
पोल्ट्री क्षेत्रमा बढ्दो लगानी र पोल्ट्री उद्योगका लागि आवश्यक पर्ने सामग्रीको अत्यधिक मागलाई मध्यनजर गर्दै दलदलेमा कम्पास एग्रो इन्डस्ट्रिज प्रालि स्थापना गरिएको प्रमुख कार्यकारी अधिकृत संगम घिमिरेले जानकारी दिए।
‘पोल्ट्री फार्मका लागि आवश्यक ९० प्रतिशतभन्दा बढी सामग्री उत्पादन शुरु गरेका छौं,’ उनले भने। कम्पनीले पोल्ट्रीको ड्रिङकर्स, फिडर्स (केजहरू ठूला, मिडियम र साना आकारमा) उत्पादन थालेको छ। प्यारेन्ट्स, ब्रोइलर र लेयर्स जातका कुखुराहरूका लागि अटोमेटिक ड्रिङकर्स, निप्पल ड्रिङकिङ सिस्टम उत्पादन भइरहेको छ।
कम्पास एग्रो इन्डस्ट्रिज प्रालिबाट उत्पादित सामग्रीको प्रयोग गरेपछि कुखुराले कहिल्यै पनि फोहरपानी नखाने र चल्ला पनि छिटो हुर्कने तथा कुखुरामा रोग कम लाग्न उनको दाबी छ। कुनै पनि वितरक, पोल्ट्री व्यवसाय तथा अन्य कम्पनीले आफ्नो लोगो र नामसहित सामान उत्पादन गराउन चाहेमा पनि उद्योगले सोहीअनुसार प्रिन्टसहितको उत्पादन उपलब्ध गराउने उनले बताए।