कास्की । जिल्लामा २१८ जनप्रतिनिधिले खर्च विवरण बुझाउन बाँकी रहेका छ । निर्वाचन सकिएको चार महिना हुँदासमेत उनीहरूले खर्च विवरण नबुझाएका हुन् ।
निर्वाचनको अन्तिम परिणाम प्रकाशित भएको ३० दिनभित्र खर्च विवरण बुझाउनु पर्ने कानूनी व्यवस्था छ । निर्वाचन कार्यालय कास्कीका अनुसार निर्वाचित भएका ३७० मध्ये २१८ जनाले विवरण बुझाउन बाँकी भएको हो ।
खर्च विवरण नबुझाएका उम्मेद्वार र जनप्रतिनिधिलाई निर्वाचन आयोगले कारबाही स्वरुप जरिवाना गरेको छ । पोखरा महानगरका मेयर धनराज आचार्यसमेत कारबाहीमा परेका छन् । उनले असार १२ गते विवरण बुझाएका थिए । तर, उनलाई निर्वाचन अधिकृतको कार्यालयले असार ११ गते निर्वाचित भएको घोषणा गरेको थियो । एक दिन ढिलो भएकाले उनी कारबाहीमा परेका हुन् ।
पोखरा महानगरका दुई दर्जनभन्दा बढी उम्मेद्वारले विवरण बुझाउन बाँकी छ । पोखराका १६ वडाध्यक्षले खर्च विवरण बुझाएका छैनन् । अन्नपूर्णका अध्यक्ष र उपाध्यक्षले विवरण बुझाए पनि अन्यले विवरण दिएका छैनन् । माछापुच्छ्रे गाउँपालिकाका अध्यक्ष र उपाध्यक्षसहित ३२ जनाले बुझाएका छैनन् । रुपा र मादीका अध्यक्ष तथा उपाध्यक्षले विवरण बुझाएका छन् भने अरुले बुझाएनन् ।
वैशाख ३० गतेको निर्वाचनमा उम्मेद्वारी दिएका एक हजार ३२७ मध्ये एक हजार ४३ जनाले विवरण नबुझाएको जिल्ला निर्वाचन कार्यालय कास्कीले जनाएको छ । विवरण बुझाएकाहरूले पनि तोकिएको समयभन्दा पछि बुझाएका छन् ।
समयमा खर्च विवरण नदिने उम्मेद्वारले पाँच लाख रुपैयाँसम्म जरिवाना तिर्नु पर्ने व्यवस्था छ । जरिवाना तिरेर ६ महिनाभित्र विवरण बुझाउन पाइन्छ । यदि, जरिवाना तिरेर विवरण नबुझाए ६ वर्षसम्म कुनै निर्वाचनको उम्मेद्वार हुन पाइँदैन ।