धरान- धरान उपमहानगरपालिकामा सडक र फुटपाथ खाली गराउने अभियान शुरु भएको छ।

धरान–२ को नरेन्द्रपथस्थित फुटपाथ उपमहानगरले खाली गराएको छ। शनिबार बिहान ६ बजे नगर प्रहरीले फुटपाथमा पसल थाप्न प्रयोग गरिएका सामग्री हटाएको हो।

भानुचोकदेखि पश्चिम नरेन्द्रपथमा व्यवस्थित सब्जी मण्डी सञ्चालनमा रहे पनि सडकमा पसल राख्दा आवागमनमा समस्या भएको गुनासोका कारण फुटपाथ खाली गराउने अभियान शुरु गरिएको उपमहानगरले जनाएको छ।

फुटपाथका पसल हटाउन सूचना जारी गरी माइकिङ गर्दा अटेरी गरेकाले पसल राख्ने स्थानहरू हटाइएको नगर प्रहरी प्रमुख विष्णु कोइरालाले जानकारी दिए।