काठमाडौं- कांग्रेस सह-महामन्त्री डिना उपाध्यायले आफूले निलम्बित प्रधानन्यायाधीश चोलेन्द्रशम्शेर जबराकै आफन्तको ढिपीका कारण आफूले उनलाई भेटेको बताएकी छन्।
जबराले आइतबार संसदीय सुनुवाइ समितिसँग बयानका क्रममा कांग्रेस नेतृ उपाध्याय आफूलाई राजीनामा दिन आग्रह गर्दै क्वार्टरमा आएको दाबी गरेका थिए। तर, आफू उनलाई राजीनामा गराउन नेताहरूको आग्रहमा भेट्न नगएको उपाध्यायले प्रष्ट पारिन्।
‘उहाँसँग सम्बन्धित व्यक्तिको अति आग्रह भएपछि म उहाँसँग भेट्न गएको कुरा साँचो हो। तर, म कुनै नेताको दूत बनेर गएकी होइन,’ उपाध्यायले नेपाली हेडलाइनसँग भनिन्, ‘पार्टी पदाधिकारी भएको नाताले बारम्बार भेट्न आग्रह गरिएपछि गएकी थिएँ, त्यो पनि अनौपचारिक रूपमा। मैले उहाँलाई आरोप लागिसकेपछि राजीनामा दिएर सम्मानित व्यक्तित्व बनेर बस्न आफ्नातर्फबाट सल्लाहसम्म दिएकी हुँ। नेताहरूले पठाउनुभएको होइन।’
अब त निलम्बित प्रधानन्यायाधीश जबरासँग भेट्न पनि जो कोही डराउनुपर्ने अवस्था उनी आफैंले तयार पारेको उपाध्यायले बताइन्। ‘प्रधानन्यायाधीश भइसकेको मान्छे के के बोल्नु हुन्छ, अनौठो लाग्यो। मैले अनौपचारिक रूपमा राजीनामा दिएर सम्मानित व्यक्तित्व भएर बस्नोस् भनेकी थिएँ। उहाँले त नेताले नै पठाएको बताउनु भएछ,’ उनले भनिन्, ‘उहाँकै सम्बन्धित मान्छेले प्रधानमन्त्रीसँग कुरा पु¥याइदिनुप¥यो भनेर आग्रह गरेका थिए। मैले हुन्छ कुरा त पु¥याइदिउँला नि भनेकी थिएँ। मलाई त भेट्ने इच्छा नै थिएन, उहाँकै सम्बन्धित मान्छेको अति आग्रहपछि भेटेकी थिएँ।’ जबराविरुद्ध महाभियोग दर्ता भएको करिब डेढ महिनापछि जबरासँग भेटेको उनले जानकारी दिइन्।