धादिङ । धादिङ जिल्ला अस्पतालमा १४ जना सरकारी स्थायी चिकित्सकको दरवन्दी छ । तर अस्पतालमा स्थायी चिकित्सक एक जना पनि छैन ।

पदपूर्ति भएको एक जना आठौं तहका मेडिकल अधिकृत डाक्टर सफलतादेवी कोजु करिब दुई वर्षदेखि अध्ययन बिदामा छिन् । स्थायी चिकित्सकबिना अस्पताल चलिरहेको धादिङ अस्पतालका सूचना अधिकारी विक्रम विकले बताए ।

ठूलो संख्यामा रिक्त रहेको स्थायी चिकित्सक दरबन्दी शुरुदेखि नै खाली छ । कहिलेकाही केही चिकित्सकलाई पदपूर्ति गरिन्छ । सूचना अधिकारी भन्छन्, ‘स्थायी चिकित्सकको कोटा शुरुदेखि नै खाली छ, १४ वटा सरकारी कोटामा एक जना चिकित्सक छैन, भन्न पनि लाजै मर्दो छ, तर हामीले सेवा चाहिँ रोकेका छैनौं, विकल्प खोजिएको छ ।’

स्थायी दरबन्दीअनुसार विशेष चिकित्सक ९ जना, मेडिकल अधिकृत ४ जना, डेन्टल सर्जन १ जना हुनु पर्ने सूचना अधिकारी विक बताउँछन् । तर, करार तथा अन्य श्रोतबाट व्यवस्थापन गरी अस्पताल चलेको छ ।

‘धादिङ अस्पतालमा करार तथा अन्य श्रोतबाट २० जना चिकित्सक छन्, कन्सल्टेण्ट जनरल सर्जन २ जना, कन्सल्टेण्ट जनरल फिजिसियन १ जना, कन्सल्टेण्ट साइक्याट्रिक १ जना, स्त्री रोग विशेषज्ञ २ जना गरी नौ तहका ६ जना विशेषज्ञ चिकित्सक रहेका छन्,’ उनले भने, ‘मेडिकल अधिकृत १२ जना र डेण्टल सर्जन २ जना गरी १४ जना ८ औ तहका चिकित्सक रहेका छन्, करार तथा अन्य श्रोतबाट रहेका चिकित्सकको भरमा अस्पताल चलेको छ, तर स्थायी दरबन्दिका चिकित्सक नभएपनि सेवामा कुनै कमी भने हुन दिएका छैनौं ।’

अस्पतालमा एघारौं तहको मेडिकल सुपरिटेन्डेण्ट रहने व्यवस्था छ । तर, सातौँ तहका हेल्थ असिष्टेण्ट डाक्टर मधुकर दाहालले निमित्त मेडिकल सुपरिटेन्डेण्टको जिम्मेवारी लिइरहेका छन् । उनी जनस्वास्थ्य बरिष्ठ स्त्री रोग विशेषज्ञ हुन् । संघबाट बाग्मती प्रदेशमा काजमा धादिङ अस्पताल आएका हुन् ।

धादिङ अस्पताल ५० शैया वेड क्षमताको प्रादेशिक अस्पताल हो । ५९ जना सरकारी दरबन्दी रहेको छ अस्पतालमा २८ जनाको दरबन्दी मात्र पदपूर्ति रहेको छ । जसमध्ये ६ जना अध्ययन बिदामा छन् । हाल अस्पतालमा २२ जना मात्र कार्यरत छन् । सरकारी दरबन्दी र पदपूति निकै कहाली लाग्दो रहेको सूचना अधिकारी विकले बताए ।

आफ्नालाई जागिर खुवाउने थलो

सरकार लोक सेवाबाट स्थायी चिकित्सक नियुक्त प्रक्रियामा अगाडि नबढ्दा करार सेवा ठूलावडाका आफ्नालाई जागिर खुवाउने थलो बनेको धादिङ अस्पताल सञ्चालन तथा व्यवस्थापन समितिका अध्यक्ष महेन्द्र धमलाले बताए । करारमा आउनेहरू पावरमा आउँछन् ।

‘करार करार नै हो, गुणस्तर तथा सेवा प्रवाह सरकारी जस्तो हुदैन, काम गराउन गाह्रो, तलब भत्ता, सेवा सुविधा र दक्षताको पनि कुरा आउँछ,’ उनले भने, ‘करार ठूला वडाको आफ्नालाई जागिर खुवाउने थलो बन्यो ।’

बाग्मती प्रदेश सरकारको स्वास्थ्य मन्त्रालयको कमजोरीका कारण स्थायी चिकित्सकको पदपूर्ति नभएको पनि उनले बताए । अस्पताल अव्यवस्थित बन्दा धादिङलगायतका विभिन्न जिल्लाबासीले समस्या भोगिरहेका छन् ।

उनले भने, ‘सम्बन्धित निकायले बुझ्न पर्ने हो, नागरिकको स्वास्थ्यमाथि खेलवाड भइरहेको छ, १४ वटा दरबन्दी रहेको अस्पतालमा एक जना स्थायी कर्मचारी नहुनुले सबैलाई जिज्याइरहेको छ ।’