कैलाली- जिल्लाको घोडाघोडी नगरपालिकामा देउडा हेर्न गएकी १५ वर्षीया किशोरीमाथि सामूहिक बलात्कार भएको छ।

२१ भदौ राति चारजनाले सामूहिक बलात्कार गरेको भन्दै किशोरीले इलाका प्रहरी कार्यालय सुखडमा जाहेरी दिएकी छन्।

आरोपी चारमध्ये तीनजना पक्राउ परेका छन्। फरार अर्का अभियुक्तको खोजी भइरहेको इलाका प्रहरी सुखडका डीएसपी लक्ष्मण शाहीले बताए। काम छ भन्दै एकान्तमा बोलाई जबर्जस्ती करणी गरेको जाहेरीमा उल्लेख छ।

किशोरी सुखड बजारको हेलीप्याडमा भइरहेको देउडा हेर्न गएकी थिइन्। सोही समयमा घटना भएको प्रहरीले जनाएको छ। बलात्कृत किशोरीलाई भोलिपल्ट बिहान असामान्य अवस्थामा बजारमा हिँडिरहेको प्रहरीले देखेपछि उपचारका लागि अस्पताल लगिएको थियो।