सुनसरी- चतराबाट धनकुटाको मुलघाट जोड्ने सडकमा पर्ने पुलहरू निर्माणको पहल अगाडि बढेको छ।
सुनसरीको बराहक्षेत्र नगरपालिका-१ चतरादेखि धनकुटा साँगुरीगढी गाउँपालिका-१० हुँदै मुलघाट जोड्ने सडकमा पुल निर्माणको अध्ययन गरिएको हो। उक्त सडक तमोर करिडोरमा जोडिन्छ। उक्त करिडोर सीधा ओलाङचुङगोलामा जोडिन्छ।
उक्त सडक खण्डमा लुकुवा, कोका, बाहने र धनसार खोलामा पक्की पुल निर्माण हुनेछन्। सडक विभागको पुल महाशाखाका प्रतिनिधि अनुप न्यौपाने नेतृत्वको टोलीले संक्षिप्त वातावरणीय अध्ययन शुरु गरेको छ।
बराहक्षेत्र १ चतराका वडाध्यक्ष किशन मगरका अनुसार सब–डिभिजन वन कार्यालयका रेन्जर शिशुराज झालगायतले स्थलगत अवलोकन गर्दै स्थानीय बासिन्दाहरूसँग छलफल पनि गरेका छन्।
वडा सदस्य कुमार भट्टराईले सो मार्ग चाँडै सञ्चालनमा आएमा भएमा धनकुटा, तेह्रथुम, भोजपुर र संखुवासभालगायत जिल्लाका बासिन्दाका लागि छोटो दूरीमा चतरा, धरान, इटहरी तथा चतरा–हेटौंडा मार्गमार्फत काठमाडौंसम्म पुग्न सहज हुनेछ।
स्थानीय अनिल सुब्बाका अनुसार यो बाटो बाटो चाँडै सञ्चालनमा आएमा राज्यलाई पेट्रोलियम पदार्थको ढुवानी खर्च पनि घट्नेछ। मुलघाटबाट चतरा आउजाउ गर्न पनि यो बाटो छोटो दूरीको हुनेछ।