सुनसरी- बराहक्षेत्र नगरपालिकाको आयोजना तथा आईएनएफ नेपाल हरियोखर्क अस्पताल पोखराको प्राविधिक सहयोगमा वडा नम्बर १ सूर्यकुण्ड आधारभूत विद्यालयमा निःशुल्क स्वास्थ्य शिविर सम्पन्न भएको छ।
शिविरमा १०३ जना बिरामीले उपचार सेवा लिएका थिए। जसमा नशा ,हाडजोर्नी, आँखा, नाक, कान, घाँटी, प्रेसर सुगरलगायत बिरामीको परीक्षण गरिएको वरिष्ठ जनरल फिजिसियन डा. प्रकाश कार्कीले जानकारी दिए।
शिविरमा वर्ष १ का बालक देवराज महतोदेखि ७५ वर्षकी खिममाया श्रेष्ठलगायत स्थानीय बासिन्दाले सेवा लिएको सामुदायिक चिकित्सा आउटरिच परियोजनाका संयोजक ज्योतिबहादुर क्षत्रीले जानकारी दिए।
स्त्रीरोग विशेषज्ञ डा. निशा अधिकारीले पनि महिलाको स्वास्थ्य परीक्षण गरेकी थिइन्। बराहक्षेत्रका मेयर रमेश कार्कीले वर्षाको समयमा पनि स्वास्थ्य शिविरमा स्थानीय बासिन्दाले आफ्नै गाउँठाउँमा विज्ञ डाक्टरहरूको उपस्थितिमा उपचार गर्न पाएको बताए। उनले बराहक्षेत्रका बासिन्दाको तर्फबाट आईएनएफ नेपाल हरियोखर्क अस्पताल पोखरा टिमका सदस्य तथा बराहक्षेत्र स्वास्थ्य शाखा परीवारलाई धन्यवाद दिए।
शिविरमा निःशुल्क औषधि वितरण गरिएको फार्मेसी सहायक प्रमोद यादवले जानकारी दिए। यसअघि मंगलबार बराहक्षेत्र नगर ६-९ श्रीलंका टापुका २५४ जनाको निःशुल्क स्वास्थ्य परीक्षण र औषधि वितरण गरिएको थियो।