काठमाडाैं : नाबालिग किशोरीलाई बलात्कार गरेको आरोप लागेका राष्ट्रिय क्रिकेट टोलीका कप्तान सन्दीप लामिछानेबारे अनुसन्धान गर्न प्रहरीले होटलको क्लोज सर्किट (सीसी) क्यामराकाे फुटेज संकलन गरेकाे छ।
प्रहरीले संकलन गरेकाे फुटेजमा पीडित किशोरी र लामिछाने भदाै ५ गते नगरकाेट र गाैशालाकाे हाेटलमा पसेकाे दृश्य देखिएकाे छ।
ती दृश्यमा लामिछाने र पीडित भनिएकी युवती ५ भदौमा होटलको कोठा नम्बर ३०५ सम्म पुगेको देखिएको प्रहरीले जनाएको छ।
जिल्ला प्रहरी परिसर, काठमाडौंका एक अधिकृतका अनुसार होटल काठमाडौं इनमा लामिछाने किशोरीसहित राति ११:५५ बजे पुगेका थिए। उनीहरु बिहान साढे ६ बजेतिर फर्किएको दृश्यमा देखिएको प्रहरी अधिकृतले बताए।
लामिछानेले होटलका सञ्चालकलाई फोन गरेरै कोठा बुक गरेको पनि पाइएको अनुसन्धानमा संलग्न अधिकृत बताउँछन्।
लामिछाने अहिले क्याराबियन प्रिमियर लिग (सीपीएल) क्रिकेट खेल्नका लागि जमैकामा छन्। केन्यामा पाँच वटा टी–२० क्रिकेट खेलेपछि उनी जमैका गएका थिए। आफूमाथि लागेको अभियोगबारे हालसम्म लामिछाने मौन छन्।