काँकडभिट्टा- कांग्रेस महामन्त्री विश्वप्रकाश शर्माले आगामी निर्वाचनमा कहाँबाट चुनाव लड्लान् ? आफ्नै गृह क्षेत्र झापा-१ कि अन्य जिल्लाबाट ? कांग्रेस वृत्तमा यो विषयले बहस निम्त्याएको छ।

कांग्रेस नेता कृष्णप्रसाद सिटौलाका कारण उनले झापा-१ बाट उम्मेदवारी नदिने चर्चा कांग्रेस वृत्तमा छ। झापा-१ बाट उम्मेदवारी नदिए उनी कहाँबाट चुनावमा उठ्छन् भन्ने स्पष्ट छैन। महामन्त्री शर्मालाई एमाले नेता गोकुल बास्कोटाको क्षेत्र काभ्रे-२, भक्तपुर-२, शशांक कोइरालाको पूर्वी नवलपरासी क्षेत्र नम्बर १ लगायतका नेता-कार्यकर्ताले उम्मेदवारी दिन आग्रह गर्दै आएका छन्।

तर, महामन्त्री शर्मा झापा-१ बाटै चुनावमा उठ्ने तयारीमा रहेको उनी निकटस्ठ एक कांग्रेस नेताले बताए । सत्ता गठबन्धनभित्र सिट बाँडफाँटको छलफल चलिरहँदा महामन्त्री शर्माको सम्भावित उम्मेदवारीबारे पनि चर्चा शुरु भएको हो। अर्का महामन्त्री गगन थापा भने काठमाडौं-४ बाटै उम्मेदवार बन्ने निश्चित छ।

गगन थापा काठमाडौं-४ मा सुरक्षित देखिएका छन्। तर, विश्वप्रकाश शर्मा निरन्तर नेता  सिटौलाको कोपभाजनमा पर्दै आएका छन्।

महामन्त्री शर्मालाई पराजित गर्न सिटौला पक्षले यसपटक सबै हथकण्डा अपनाउने तयारी थालेको छ। गत पालिका चुनावमा आफ्नो पक्षका नेतालाई मेचीनगर नगरपालिकाको मेयर उम्मेदवार बन्नबाट शर्माले रोकेको आरोप सिटौला पक्षले महामन्त्री शर्मामाथि लगाउँदै आएको छ।

सोही कारण प्रतिनिधिसभा निर्वाचनमा शर्मालाई हराउनकै लागि सिटौला पक्षले करोडौं खर्च गर्न पनि पछि नपर्ने मेचीनगरका एक कांग्रेस नेता बताउँछन्। ‘तर, जति हल्ला गरे पनि झापा-१ मा सिटौला पक्षको उपस्थिति बलियो छैन। त्यसैले उहाँले सहजै चुनाव जित्नु हुन्छ,’ ती नेताले नेपाली हेडलाइनसँग भने, ‘यदि सिटौला पक्षले उहाँलाई हराउन भूमिका वहन गर्‍यो भने चुनावपछि पनि त सिटौला र उनका समर्थकलाई राजनीति गर्नु पर्ला नि। गएको पालिका चुनावमा अन्तरघात गर्नेहरूमाथि कांग्रेसले कडा रवैया अपनाएको उहाँहरूलाई जानकारी नै होला !’

झापा-१ बाट ०७४ सालको निर्वाचनमा माओवादी केन्द्रका सुरेन्द्र कार्की विजयी भएका थिए। तर, चुनाव जितेर गएपछि क्षेत्रलाई फर्केर पनि नहेरेको गुनासो आम मतदाताको छ। सोही कारण यसपटक कार्कीले उक्त क्षेत्रबाट टिकट पाउने सम्भावना न्यून छ।