काठमाडौँ । नेकपा एमाले बागमती प्रदेश संगठन कमिटीले अग्रज सम्मान कार्यक्रम गर्ने भएको छ । प्रदेश अध्यक्ष केशवराज पाण्डेको अध्यक्षतामा सोमबार पार्टी कार्यालय च्यासलमा बसेको पदाधिकारी बैठकले उक्त निर्णय गरेको हो ।
प्रदेशभित्रका सबै जिल्लामा नेपालको कम्युनिस्ट आन्दोलनमा तथा समाजका विभिन्न क्षेत्रमा रहेर अतुलनीय योगदान गर्ने अग्रणी व्यक्तिको खोजी तथा पहिचान गरी उनीहरूको सम्मानका लागि जिल्ला स्तरमा अग्रज सम्मान कार्यक्रम आयोजना गर्ने निर्णय गरेको प्रदेश कमिटीका उपसचिव तथा प्रचार विभाग प्रमुख महेश बर्तौलाले बताए ।
बैठकले प्रदेश कमिटीमा रिक्त रहेका स्थानमा तथा एकता प्रक्रियाबाट पार्टीमा प्रवेश गरेका दश जनालाई प्रदेश कमिटीको जिम्मेवारी दिने निर्णय गरेको छ । जिम्मेवारी प्राप्त गर्नेमा श्रीधर पोखरेल, सुमित्रा राजवंशी, अच्युत श्रेष्ठ, खेम भट्ट, गोपाल जि गुप्ता, मनरत्न शाक्य, सीता ढकाल, भुवन केसी, देवेन्द्र खत्री र सुरेश राना रहेका छन् । त्यसैगरी, प्रदेश कमिटीका विभिन्न विभागमा सदस्य मनोनित गरी विभागलाई पूर्णता दिइएको छ ।
बाग्मती प्रदेश कमिटीले बुद्धिजीवीसँग अन्तरक्रिया गरी उनीहरूका कुरा सुन्ने निर्णय गरेको छ । भदौ १० गते काठमाडौँमा एक कार्यक्रम आयोजना गरेर बुद्धिजिवीका कुरा सुन्ने निर्णय गरेको छ । बैठकपछि प्रदेश कमिटीका उपसचिव एवं प्रचार विभागका प्रमुख बर्तौलाले विज्ञप्ति जारी गरी ‘बुद्धिजीवीको आँखामा नेकपा एमाले’ विषयमा समाजमा विभिन्न क्षेत्रका बुद्धिजीवीको सहभागितामा उनीहरूको एमालेप्रतिको आलोचना, सुझाव र टिप्पणी सङ्कलन गरिने जनाइएको छ ।
बैठकले अकाशिदो महंगी, भ्रष्टाचार, कमिशनतन्त्रको विरोधमा गठबन्धन सरकारलाई खवरदारी गर्ने निर्णय गरेको छ ।
बैठकले प्रदेश लेखा समिति गठन गर्ने निर्णय गरेको छ ।
त्यसैगरी बाग्मती प्रदेश जनसंगठनहरूको बैचारिक, राजनीतिक तथा संगठनात्मक कामलाई व्यवस्थित र प्रभावकारी ढंगले अगाडि बढाउन प्रदेश जनसंगठन समन्वय संयन्त्रको तत्काल बैठक कार्य योजना बनाउने निर्णय गरेको छ ।