काठमाडौँ । निलम्बित प्रधानन्यायाधीश चोलेन्द्र शमशेर जबराविरुद्धको महाभियोग प्रस्तावमाथि छलफल हुने भएको छ । आइतबार बस्ने प्रतिनिधिसभाको बैठकमा उनीविरुद्धको महाभियोगमाथि छलफल हुने भएको हो ।
संघीय संसद्का महासचिव भरतराज गौतमले आइतबारका लागि जारी गरेको प्रतिनिधिसभाको सम्भावित कार्यसूचीमा महाभियोग प्रस्तावमाथि छलफल हुने जनाएको छ । कार्यसूचीमा भनिएको छ, ‘मिति २०७८ फागुन २९ गतेको बैठकमा देवप्रसाद गुरुङले नेपालको संविधानको धारा १०१ को उपधारा २ एवं प्रतिनिधिसभा नियमावली, २०७५ को नियम १६१ को उपनियम १ बमोजिम प्रस्तुत गर्नु भएको प्रधानन्यायाधीश चोलेन्द्र शमशेर जबराविरुद्ध दर्ता भएको महाभियोग प्रस्तावमाथि छलफल हुने ।’
जबराविरुद्ध सत्तारुढ दलहरू नेपाली कांग्रेस, नेकपा माओवादी केन्द्र, नेकपा समाजवादी केन्द्रलगायत दलहरूले विभिन्न २१ आरोप लगाउँदै महाभियोगको प्रस्ताव दर्ता गरेको थियो । फागुन १ गते प्रतिनिधिसभामा दर्ता भएको महाभियोगपछि जबरा स्वतः निलम्बनमा परेका थिए ।
महाभियोग लगाएर प्रधानन्यायाधीशलाई निलम्बनमा राखेको भन्दै प्रमुख प्रतिपक्षी दल एमालेले विरोज जनाउँदै आएको थियो । नेपाल बार एसोसिएसनले समेत न्यायालयको प्रमुखलाई निलम्बनमा राखेको भन्दै सभामुख अग्निप्रसाद सापकोटालाई भेटेर प्रक्रिया अगाडि बढाउन आग्रह गरेको थियो ।