काठमाडौँ । त्रिभुवन विमानस्थल भन्सार कार्यालयले गत आर्थिक वर्षमा लक्ष्यभन्दा बढी राजस्व संकलन भएको छ । आर्थिक वर्ष २०७८–७९ का लागि तोकिएको राजस्व बढी संकलन भएको विमानस्थलले जनाएको छ ।

विमानस्थलको भन्सार विभागले २३ अर्ब १५ करोड राजस्व संकलन गर्ने लक्ष्य तोकिदिएको थियो । सो अवधिमा कार्यालयले २३ अर्ब ७५ करोड रुपैयाँ संकलन गरेको हो । यो लक्ष्यभन्दा ६० करोड रुपैयाँले बढी हो ।

यस कार्यालयले विगत चार वर्षपछि पहिलोपटक आफ्नो लक्ष्यभन्दा बढी राजस्व संकलन गर्न सफल भएको हो । विशेषगरी भन्सार जाँचपासको क्रममा हुने वस्तु वर्गीकरण तथा मूल्यांकनको कार्यमा गरिएको सुधार, अवैध रूपमा हुन सक्ने चोरी निकासी पैठारी नियन्त्रणमा गरिएको कडाई, भन्सार चोरी पैठारी सम्बन्धमा विगत लामो समयदेखि पेश भई फैसला हुन बाँकी रहेका मुद्दाको फर्छ्यौटजस्ता विषयले राजस्व संकलनमा वृद्धि भएको हो ।

साथै सुन तथा सुनका गहना र मोबाइललगायत अन्य वस्तुलाई भन्सार राजस्वको दायरामा ल्याउनका लागि गरिएको विशेष प्रयासबाट समेत राजस्व संकलनमा योगदान पुगेको विमानस्थल भन्सार विभागले जनाएको छ ।