कोलम्बो- श्रीलंकाको राष्ट्रपति भवनबाट त्यहाँको सेनाले सरकारविरोधी प्रदर्शनकारीहरूलाई बाहिर निकालेको छ।
अहिले राष्ट्रपति भवन सेनाले नियन्त्रणमा लिएको छ। केही दिनदेखि प्रदर्शनकारीहरूले राष्ट्रपति भवन कब्जामा लिएका थिए।
राष्ट्रपति भवन पूर्ण नियन्त्रणमा लिएपछि सेनाले आम मानिसलाई भित्र पस्न दिएको छैन। अहिले भवनभित्र सैनिक टुकडी र सञ्चारकर्मीहरू मात्र छन्।
बढ्दो महँगी, इन्धन र दैनिक उपभोग्य वस्तुको चरम अभावको कारणबाट शुरु भएको प्रदर्शन राष्ट्रपति गोटाबाया राजापाक्षेलाई देश छाडेर भाग्न बाध्य बनाउनेसम्मको विकास क्रममा अगाडि बढेको छ। प्रदर्शनकारीहरूले प्रधानमन्त्री रनिल बिक्रमासिंघेको पनि राजीनामा माग गरिरहेका छन्।
राष्ट्रपति राजापाक्षे सैनिक जहाजमार्फत पहिले माल्दिभ्सको माले र त्यहाँबाट सिंगापुर भागेका छन्। राष्ट्रपति र प्रधानमन्त्री दुवैको राजीनामा नआउँदा श्रीलंकामा प्रदर्शन जारी छ। प्रदर्शनकारीहरूले धेरै सरकारी भवन कब्जामा लिएका छन्।
प्रधानमन्त्री बिक्रमासिंघले संकटकाल घोषणा गरेपछि त्यहाँको सेना तनाव कम गराउन सडकमा निस्केको छ।
श्रीलंकाको राष्ट्रपति भवन करिब तीन सय वर्ष पुरानो सम्पदा पनि हो। भवनमा प्रवेश गरेका प्रदर्शनकारीहरूले त्यहाँ घुम्दैफिर्दै मनोरञ्जन गरिरहेका भिडियो सार्वजनिक भएका थिए। कतिपय प्रदर्शनकारी स्विमिङ पुलमा पौडी खेलिरहेको त कतिपय जिम गर्दै गरेको देखिएका थिए।