काठमाडौं- पिपुल्स पावर लिमिटेडले आयोजना प्रभावित क्षेत्रका बासिन्दाका लागि साधारण सेयर निष्कासन र बिक्री खुला गरेको छ।
कम्पनीले बुधबारदेखि प्रतिकित्ता १०० रुपैयाँ अंकित दरमा ६ करोड ३२ लाख ६० हजारबराबरको ६ लाख ३२ हजार ६०० कित्ता प्रारम्भिक सार्वजनिक निष्कासन (आईपीओ) बिक्री खुला गरेको हो।
कम्पनीले कूल निष्कासनमध्ये आयोजनाबाट असर पर्ने इलाम नगरपालिका–१ र ४ का बासिन्दालाई एक लाख ८९ हजार ७८० कित्ता र ती वडाबाहेक जिल्लाका बासिन्दाका लागि चार लाख ४२ हजार ८२० कित्ता सेयर खरिदका लागि आवेदन माग गरेको छ।
लगानीकर्ताले २२ असारसम्म उक्त मागबमोजिम सेयर खरिदका लागि आवेदन दिन सक्ने र सो अवधिमा मागबमोजिम आवेदन नपरे ५ साउनसम्म १० कित्तादेखि ५० हजार कित्ता सेयर खरिदका लागि आवेदन दिन पाउने कम्पनीको आह्वानपत्रमा उल्लेख छ।
कम्पनीले इलाम नगरपालिका १ र ४ मा पर्ने पुवा खोलामा ४.९६ मेगावाटको पुवा–२ जलविद्युत् आयोजना निर्माण गरिरहेको छ। लगानीकर्ताले धितोपत्र बोर्डबाट अनुमतिप्राप्त आस्वा सेवामा सहभागी बैंक तथा वित्तीय संस्थाबाट आस्वा प्रणालीमार्फत सेयर खरिदका लागि आवेदन दिन सक्नेछन्।
नेपाल बंगलादेश बैंकको फिक्कल शाखा, प्रभु बैंकको सन्दकपुर र इलाम शाखा, ग्लोबल आईएमई बैंकको फिक्कल र इलाम शाखा, प्राइम कमर्सियल बैंकको राँके, मंगलबारे, विलौते, तीनघरे र इलाम शाखाबाट आवेदन दिन सकिने कम्पनीको धितोपत्र निष्काशन तथा बिक्री प्रबन्धक प्रभु क्यापिटल लिमिटेडले जनाएको छ।