धरान- प्रेमिकाको मृत्युपछि धरानस्थित बीपी कोइराला स्वास्थ्य विज्ञान प्रतिष्ठानका एक चिकित्सक पक्राउ परेका छन्।

स्थानीय होटलमा बसेकी युवतीले आत्महत्या प्रयास गरेकी थिइन्। उनको उपचार क्रममा शुक्रबार बिहान मृत्यु भएको थियो। आफ्ना प्रेमी तथा प्रतिष्ठानका चिकित्सक डा. करण यादवलाई भेट्न उनी काठमाडौंबाट धरान आएको खुलेको छ। डा. यादव प्रतिष्ठानको आकस्मिक कक्षमा कार्यरत छन्।

प्रहरीका अनुसार धरान–१० स्थित जनहित होटलमा पर्सा वीरगन्ज घर भएकी २६ वर्षीया प्रकृति सुवेदीले झुण्डिएर आत्महत्या प्रयास गरेकी थिइन्। उनी गत मंगलबारदेखि होटलमा बस्दै आएको खुलेको छ। तत्काल उद्धार गरेर उनलाई प्रतिष्ठानको आईसीयू कक्षमा भर्ना गरिएको थियो। उपचार क्रममा उनलाई चिकित्सकले मृत घोषित गरेका थिए।

डा. यादवलाई नियन्त्रणमा लिएर अनुसन्धान शुरु गरिएको प्रहरीले जनाएको छ। मृतक युवती विवाहित रहेको र श्रीमानसँग सम्बन्ध विच्छेदको प्रक्रियामा रहेको खुलेको पनि प्रहरीले जनाएको छ।