नेपाल सरकारले सरकारी कर्मचारीलाई दुई दिन विदा दिने निर्णय एक महिनामै फिर्ता लियो। श्रीलंका सरकारले भने आफ्ना कर्मचारीलाई सातामा दुई दिन विदा दिन थालेको छ।
नेपाल सरकारले आन्तरिक पर्यटक बढाउने उद्देश्यले शनिबार र आइतबार विदा दियो, जेठ महिनाभर। १ असारदेखि त्यसलाई फेरि एक दिनमै सीमित गर्यो।
श्रीलंकाले भने कृषि काममा लगाउन कर्मचारीलाई दुई दिन विदा दिन थालेको छ। बढ्दो खाद्य संकटबाट बाहिर निस्किन श्रीलंकाले कर्मचारीलाई पनि कृषि कर्ममा लगाउन थालेको हो।
त्यसबाट खेतीमा कर्मचारीको उत्साह बढ्ने त्यहाँको सरकारको अपेक्षा छ। श्रीलंकामा करिब १० लाख कर्मचारी छन्।
श्रीलंकाको आवादी करिब दुई करोड २० लाख छ। र, ७० वर्षयताकै सर्वाधिक कठिन घडीबाट गुज्रिरहेको छ, यो मुलुक। आर्थिक संकट यति गहिरिएको छ कि इतिहासमै कहिल्यै सामना गर्नु नपरेको खाद्य संकटबाट गुज्रिरहेको छ, श्रीलंका।
खाद्यान्न, इन्धन, औषधिलगायत अत्यावश्यक वस्तु प्राप्त गर्न नागरिकले संघर्ष गर्नु परिरहेको छ। विदेशी मुद्रा सञ्चिती ह्वात्तै घट्दा दैनिक उपभोग्य सामग्री आयात गर्न नसक्ने अवस्थामा पुगेको छ।
संकटबाट बाहिर निस्किन श्रीलंकाले अलग-अलग प्रयोग गरिरहेको छ। सरकारी कर्मचारीलाई दुई दिन विदा दिने निर्णय पनि अर्को नयाँ प्रयोग हो। र, त्यसबाट खाद्यान्न उत्पादन बढेर आयात गर्नुपर्ने विगतको कमजोरीबाट बाहिर निस्किन सकिने सरकारको आकलन छ। यो प्रयोग आगामी तीन महिनाका लागि लागू गरिएको हो।