काठमाडौं– प्रधानमन्त्री शेरबहादुर देउवा निकट एक कामू वरिष्ठ प्रहरी उपरीक्षक (एसएसपी)लाई एक नम्बरमा ‘कन्फर्म’ एसएसपी बनाउन सशस्त्र प्रहरीको नियमावली संशोधनको विषय अहिले विवादमा छ। तर, त्यसको लाभ एसएसपी बन्न चाहने एसपीहरूलाई हुने देखिएको छ।

गृह मन्त्रालयले सशस्त्र प्रहरीमा एसएसपी बढुवा हुन चार वर्ष एसपीमा काम गरेको हालको व्यवस्था संशोधन गर्दै तीन वर्षमा झार्ने तयारी अगाडि बढाएको छ। त्यसका लागि अर्थ मन्त्रालयले पनि सहमति दिइसकेको छ।

खासमा, नियमावलीको यो संशोधन हाल कामू एसएसपी रहेका दीपेन्द्र कुँवरलाई ‘कन्फर्म’ एसएसपी बनाउन र वरियता क्रममा एक नम्बर ल्याएर महानिरीक्षक (आईजीपी) बनाउने योजनाअन्तर्गत भइरहेको सशस्त्र प्रहरीका अधिकारीहरू बताउँछन्। नेपाली हेडलाइनसँग सम्पर्कमा आएका अधिकांश अधिकृतले किन नियमावली संशोधन गर्न लागिएको हो भन्ने प्रश्नमा ‘दीपेन्द्र कुँवरलाई एक नम्बर वरियतामा कन्फर्म एसएसपी बनाउन’ भन्ने जवाफ दिए।

तर, उनीहरू आफैंले चार वर्षको साटो तीन वर्ष एसपी भएपछि एसएसपी बन्ने प्रावधानले सबै ब्याचलाई करिअरको सहज मार्ग दिने बताए।

शुरुमा नेपाल प्रहरी र नेपाली सेनाबाट एक पद बढुवा गर्दै ल्याइएका अधिकृतलगायत दर्जालाई समेटेर १ माघ ०५७ मा सशस्त्र प्रहरी गठन भएको थियो। सशस्त्र प्रहरीले २६ कात्तिक ०५९ मा पहिलोपटक नौजना इन्स्पेक्टर भर्ना लिएको थियो। यस्तै, सोही वर्ष २९ चैतमा ७० जना इन्स्पेक्टर सशस्त्रमा भर्ना भएका थिए। पहिलो ब्याचका नौजना ३० जेठमा कन्फर्म एसएसपी बनेका छन्। दोस्रो ब्याचका ३४ जना कामू एसएसपी छन्। पहिलो ब्याचका नौजना पनि कामू एसएसपी थिए। उनीहरूलाई कामू एसएसपी बनाउनुको कारण थियो, एसपीमा चार वर्ष पदावधि नपुग्नु।

दुवै ब्याचका ती अधिकृतले करिब तीन वर्ष मात्र एसपी बन्न पाएका थिए। कारण– उनीहरू डेढ दशकभन्दा लामो समय डीएसपीमै रहन बाध्य भए, माथिल्लो ¥यांकका अधिकृतहरू अवकाशमा जान समय लागेकाले। नियमावली संशोधन गरेर एसएसपी बन्न तीन वर्षको प्रावधान मात्र राखियो भने दोस्रो ब्याचका हाल एसपी रहेका अधिकृतहरूलाई पनि एसएसपीको दरबन्दी खाली हुनासाथ बढुवा हुने बाटो खुल्नेछ। त्यसका लागि उनीहरूले ‘कामु’ दर्जामा रहनुपर्ने छैन।

दोस्रो ब्याचका ३६ जना अधिकृत अहिले पनि एसपी छन्। अहिले सशस्त्र प्रहरीमा दुई एसएसपीको दरबन्दी खाली छ। उक्त दरबन्दीमा बढुवा हुन २० जना एसपीहरू प्रतिस्पर्धामा छन्। पदावधिको प्रावधान चारबाट तीन वर्षमा झारियो भने एसपीबाट सीधै एसएसपी बन्न पाउने छन्, दुई अधिकृतले। नत्र फेरि कामू एसएसपीमै काम गर्नुपर्नेछ, केही समय।

कामु एसएसपी दीपेन्द्र कुँवरलाई कन्फर्म बनाउन भइरहेको यो चलखेलको परिणाम भने सकारात्मक आउने आकलन गर्न सकिन्छ। अहिले एक नम्बर वरियतामा बढुवा हुँदैमा उनी भविष्यमा पनि डीआईजी र एआईजी पनि एक नम्बरमै बढुवा भएर आईजीपीका तयार हुन्छन् भन्ने कुनै ग्यारेन्टी छैन।