काठमाडौं- संसदले सरकारलाई तत्काल कृषकका लागि मल उपलब्ध गराउन निर्देशन दिएको छ।

सम्भाव्य सबै उपाय अबलम्बन गरेर किसानको खेतबारीमा मल तत्काल पुर्‍याउन प्रतिनिधिसभाले सरकारलाई निर्देशन दिएको हो।

प्रतिनिधिसभामा सोमबार एमाले प्रमुख सचेतक विशाल भट्टराईले पेश गरेको रासायनिक मलसम्बन्धी जरुरी सार्वजनिक महत्त्वको प्रस्तावमाथिको छलफलपछि सरकारलाई यस्तो निर्देशन दिइएको हो। प्रस्तावलाई प्रतिनिधिसभाले सर्वसम्मतिले पारित गरेको छ।

‘कुल ग्रार्हस्थ्य उत्पादनमा २५ प्रतिशत योगदान दिने कृषि क्षेत्रको समस्या समाधान गर्न प्राथमिकता दिँदै कृषि उत्पादन वृद्धि गर्न आवश्यक रासायनिक मल कृषकलाई सहज रूपमा उपलब्ध गराउन सम्भाव्य सबै उपाय अवलम्बन गरी कार्य सम्पादन गर्न प्रतिनिधिसभाको यो बैठक नेपाल सरकारलाई निर्देश गर्दछ,’ पारित प्रस्तावमा भनिएको छ।