काठमाडौँ । नेकपा एमालेकी सांसद गंगा चौधरीले बलात्कारको मुद्दामाथिको विधेयकमाथि कडा खण्डन गरेकी छन् । उनले बलात्कारसम्बन्धी मुद्दाको हदम्याद हटाउन नहुने भन्दै सरकारकाले ल्याउन लागेको विधेयकमाथि विरोध जनाएकी हुन् ।
सोमबार बसेको प्रतिनिधिसभामा सो विधेकयमाथिको छलफल भएको थियो । सोही क्रममा बोल्दै मन मिलुन्जेल प्रेम सम्बन्ध र मन नमिलेपछि बलात्कारका मुद्दा लगाउने प्रवृति बढेको बताउँदै हदम्याट हटाउन नहुने बताएकी हुन् ।
उनले धेरै पुरुषहरू पनि पीडित भएको बताउँदै भावनामा बगेर कानून बनाउन नहुने तर्क राखिन् । पूर्वसभामुख कृष्णबहादुर महरा र अभिनेता पल शाहको समेत उदाहरण दिएकी चौधरीले प्रेम सम्बन्धलाई बलात्कारको आरोप लाउने प्रवृत्तिलाई प्रश्रय दिन नहुने बताइन् ।
‘महिला हुँ भन्दैमा महिलाको भावनामात्र बुझ्ने होइन, पुरुषको भावना पनि बुझ्नु पर्छ, अस्ति भर्खरकै केस पल शाहको कुरा जबसम्म मन मिल्यो लभको संज्ञा दिने, स्वार्थ पूरा भएन भने बलात्कारको संज्ञा दिने,’ उनले भनिन्, ‘हामीले यही सदनका पूर्वसभामुखको घटना पनि हेरेका थियौं, स्वार्थ मिलुन्जेल कसैलाई पत्तो थिएन, स्वार्थ नमिलेपछि बलात्कारको संज्ञा दिएर ६–६ महिना जेलमा कोचियो ।’
उनले बलात्कार मुद्दामा हदम्याद नराखे मुद्दाको चाङ लाग्ने बताइन् ।