काठमाडौँ । भारतले श्रीलंकाका लागि अत्यावश्यक स्वास्थ्य सामग्री पठाएको छ । ‘छिमेकीलाई प्राथमिकता’ भन्ने भारतको नीतिअनुसार श्रीलंकालाई पुनः स्वास्थ्य सामग्री पठाइएको भारतीय अधिकारीले जनाएका छन् ।
आर्थिक संकटमा परेको श्रीलंकालाई सहयोग स्वरूप ३.३ टन अत्यावश्यक स्वास्थ्य सामग्री पठाइएको भारतको भनाइ छ । कोलम्बोका लागि भारतीय उच्च आयुक्त गोपाल बग्लायले श्रीलंकाका प्रतिनिधिलाई ती सामग्री शुक्रबार हस्तान्तरण गरेका हुन् ।
आर्थिक संकटका कारण स्वास्थ्य सामग्री किन्न नसकेका र देशभित्र अत्यधिक मूल्य वृद्धि भएकाले श्रीलंकाले स्वास्थ्य सामग्री उपलब्ध गराउन अन्य देशसँग अनुरोध गरेको थियो ।
श्रीलंकाका नागरिकले पनि स्वास्थ्य सामग्रीको मूल्य वृद्धि र अभाव भएको भन्दै तत्काल त्यसको व्यवस्था गर्न माग गरेका थिए । आर्थिक संकटले बहुआयामिक संकटमा परेको श्रीलंकामा इन्धन, अमेरिकी डलर, खाद्य पदार्थलगायतका अन्य धेरै सामाग्री अभाव भइरहेको छ ।
अत्यावश्यक परेका चिज भारतसहित धेरै देशले श्रीलंकालाई उपलब्ध गराउँदै आएका छन् । भारतले यसअघि पनि स्वास्थ्य सामग्रीलगायतका धेरै प्रकारका सहयोग उपलब्ध गराएको थियो ।
यी सामग्री उपलब्ध गराउने प्रतिबद्धता भारतले यसअघि नै गरेको थियो । ‘हाम्रो प्रतिबद्धता अर्को पनि पूरा भएको छ, हामीले श्रीलंकालाई अत्यावश्यक परेको स्वास्थ्य सागम्री उपलब्ध गराएका छौँ,’ श्रीलंकास्थित भारतीय उच्च आयुक्तको कार्यालयले सामाजिक सञ्जालमा लेखेको छ ।
