टेस्लाका १० प्रतिशत कर्मचारी कटौती गर्ने र नयाँ भर्ना नलिने एलन मस्कको घोषणापछि कम्पनीको सेयरमा तीव्र गिरावट आएको छ।

विद्युतीय कार कम्पनी टेस्लाका कर्मचारी कटौती गर्ने मस्कको घोषणाले उसको सेयरमा धक्का लागेको हो। मस्कले शुक्रबार कम्पनीलाई इमेल पठाउँदै पछिल्लो आर्थिक अवस्थाका कारण कर्मचारी कटौती अनिवार्य देखिएको उल्लेख गरेका छन्।

यसअघि अमेरिकी श्रम विभागले मे महिनामा चार लाख नयाँ रोजगारी सिर्जना गर्ने बताएको थियो। तर, अमेरिकाको बजारमा महँगी आकाशिँदो छ। आगामी महिना फेडरल रिजर्भ बैंकले व्याजदरमा बढोत्तरी गर्ने सम्भावना छ।

समाचार एजेन्सी रोयटर्सका अनुसार अमेरिकाको अर्थतन्त्रमा देखिएको संकटलाई मध्यनजर गर्दै मस्कले टेस्लाको कर्मचारी कटौती गर्ने योजना बनाएका हुन्। तर, त्यसको अझ नकारात्मक असर परेको छ। अमेरिकी स्टक एक्स्चेन्जमा टेस्लाको सेयर नौ प्रतिशत तल झरेको छ। यस्तै, नेस्डेकमा टेस्लाको सेयर दुई प्रतिशत गिरावट भएको छ।