काठमाडौं- कबडी-४ की अभिनेत्री मिरुना मगरलाई दुर्व्यवहार गरेको आरोपमा पक्राउ परेका भिक्षु फुर्वा लामा धरौटीमा रिहा भएका छन्।
जिल्ला प्रशासन कार्यालय काठमाडौंको आदेशमा मुगु घर भएका लामालाई मंगलबार तीन हजार रुपैयाँ धरौटीमा रिहा गरिएको प्रहरीले जनाएको छ।
सुन्धारास्थित सिभिल मलको कफी सपमा लामाले आफूमाथि दुव्यवहार गरेको भन्दै अभिनेत्री मगरले उनीमाथि हातपात गरेकी थिइन्। त्यसपछि उनले दुर्व्यवहार गरेको दाबी गर्दै मगरले प्रहरीमा उजुरी दिएकी थिइन्। त्यसलगत्तै प्रहरीले लामालाई पक्राउ गरी जनसेवा प्रहरी वृत्तमा राखेको थियो।
पक्राउ परेका लामालाई रिहाइ गर्न माग गर्दै राजधानीमा प्रदर्शन चर्किएको थियो। मंगलबार बिहान युवाको एक समूहले चाबहिलस्थित केएल टावर अगाडि प्रदर्शन गर्दै फिल्म ‘कबड्डी-४’ विरुद्धसमेत नाराबाजी गरेका थिए। उनीहरूले फिल्मको पोस्टर र अभिनेत्री लामाको पुत्ला दहन गरेका थिए।