मुस्ताङमा तारा एयरको ट्विनअटर जहाज दुर्घटनाको मुख्य कारण मौसमी ‘ट्र्याप’ देखिएको नागरिक उड्डयन प्राधिकरणले जनाएको छ।

संघीय संसदको अन्तर्राष्ट्रिय सम्बन्ध समितिको बैठकमा प्राधिकरणले उक्त जहाज दुर्घटनाको मुख्य कारण खराब मौसम रहेको जानकारी दिएको हो।

मौसमको ट्र्यापमा परेको जहाजलाई दायाँ मोड्नु पर्नेमा बायाँ मोड्दा दुर्घटनामा परेको प्राधिकरणको प्रारम्भिक निष्कर्ष छ।

घटनाको जाँचबुझ आयोग गठन गरी थप अनुसन्धानपछि सत्यतथ्य पत्ता लगाइने प्राधिकरणले संसदीय समितिलाई बताएको छ।

जहाज दुर्घटनास्थल जोमसोम विमानस्थलबाट आठ नटिकल माइल दूरीमा पर्छ। उक्त जहाज मुस्ताङको थासाङ गाउँपालिका–२ स्थित सानुसरे भन्ने भीरमा ठोक्किएर दुर्घटना भएको अवस्थामा सोमबार बिहान भेटिएको थियो। विमानमा सवार १९ यात्रु र तीन चालक दलका सदस्यसहित २२ जनाको मृत्यु भएको छ।