वागमती प्रदेशको आगामी आर्थिक वर्ष ०७९-८० को नीति तथा कार्यक्रम सोमबार आउने भएको छ। प्रदेश सरकारले आगामी आवको नीति तथा कार्यक्रम सोमबार बस्ने प्रदेशसभा बैठकमा प्रस्तुत गर्ने भएको हो।
दिउँसो २ बजे बस्ने प्रदेशसभा बैठकमा सरकारको तर्फबाट प्रदेश प्रमुख यादवचन्द्र शर्माले सदनमा नीति तथा कार्यक्रम प्रस्तुत गर्नेछन्।
देश संघीयतामा गएपछि पहिलोपटक बनेको प्रदेश सरकारको यो अन्तिम कार्यकाल हो। प्रदेश सरकारले पाँचौंपटक नीति तथा कार्यक्रम ल्याउन लागेको भए पनि गठबन्धनको नेतृत्वमा भने पहिलोपटक सदनमा नीति तथा कार्यक्रम आउन लागेको हो।
आगामी आर्थिक वर्षको नीति तथा कार्यक्रममा प्रदेश सरकारले कृषि, उत्पादन, रोजगारी र आत्मनिर्भरतालाई प्राथमिकतामा राखेको प्रदेश सरकारले बताएको छ।
यसअघि शुक्रबार बसेको प्रदेशसभा बैठकमा प्रदेश सरकारको तर्फबाट अर्थमन्त्री शालिकराम जम्मकट्टेलले नीति तथा कार्यक्रमको सिद्वान्त र प्राथमिकता संसदमा प्रस्तुत गरिसकेका छन्।उनले शुक्रबार संसदमा पेस गरेको प्रि-बजेटमाथि शनिबार सांसदहरूले छलफल गरेका थिए।