तारा एयरको बेपत्ता जहाज मुस्ताङको लेतेआसपास दुर्घटनामा परेको जानकारी स्थानीय बासिन्दाबाट आएकाले सेनाको टोली सोही क्षेत्रमा परिचालन भएको नेपाली सेनाका प्रवक्ता सहायक रथी नारायण सिलवालले जानकारी दिएका छन्।
काठमाडौंबाट हेलिकोप्टरसहितको उद्धार टोली परिचालित भएको उनले नेपाली हेडलाइनलाई जानकारी दिए। मुस्ताङको घासाबाट सेनाको ६२ जनाको पैदल टोली पनि परिचालन भएको उनले जानकारी दिए।
‘दुर्घटनाको आशंका गरिएको क्षेत्रमा भिजिबिलिटी एकदमै कम छ, आधा किलोमिटर पनि छैन,’ उनले भने, ‘बाक्लो हुस्सु लागेको छ, पानी परिरहेको छ।’
उनका अनुसार लेते आसपासमा दुर्घटना भएको भनेर स्थानीय बासिन्दाले दिएको जानकारीलाई आधार बनाई सोही स्थानलाई केन्द्रित गरेर सुरक्षा फौज मुभ भएको छ। ‘स्थानीय बासिन्दाले दिएको लोकेसनअनुसार हामी एक–आधा किलोमिटरको नजिक पुगेका छौँ भनेर अन्दाज गरिएको अवस्था छ। तर, भौतिक रूपमा जहाज लोकेट भइसकेको छैन,’ प्रवक्ता सिलवालले भने।
उनका अनुसार पोखरामा उद्धार टोलीसहितको हेलिकोप्टरलाई ‘स्ट्यान्डबाई’ छ। र, मौसममा केही सुधार देखिएपछि उड्ने तयारीमा छ। छिट्टै दुर्घटनास्थल पत्ता लाग्न सक्ने उनले बताए।