काठमाडौँ । हातहतियार तथा धम्कीको मुद्दामा पक्राउ परेका सुर्खेत जिल्लाको बराहताल १ घोडाआँखेका विजयविक्रम शाहको सट्टामा कारागारमा राखिएको बालकको मृत्यु भएको छ ।
पेस्तोल, पाँच मोबाइल र १५ सिमकार्डसहित २३ फागुन ०७४ मा नेपालगञ्जबाट पक्राउ परेका शाहलाई षड्यन्त्र गरी बाहिर निकालेर उनको ठाउँमा सुन्दर हरिजनलाई राखिएको थियो । १८ वर्ष पूरा नभएका नाबालिग हरिजन रोल्पा कारागारमा मृत भेटिएसँगै प्रहरीले परिवारलाई शव बुझाएको छ ।
व्यापारीलाई मार्ने धम्की दिँदै लाखौं फिरौती माग्ने धन्दामा सक्रिय शाहसहित पाँच जनालाई प्रहरीले पक्राउ गरेको थियो । अनुसन्धानपछि सरकारी वकिल कार्यालय बाँकेले संगठित अपराध निवारण ऐनअनुसार आपराधिक लाभ (फिरौती)मा जिल्ला अदालत बाँकेमा शाहविरुद्ध मुद्दा दर्ता गरायो ।
३० असार ०७६ मा न्यायाधीश रामप्रसाद बस्यालको इजलासले शाहलाई असुली धन्दाको मुख्य योजनाकार ठहर गर्दै पाँच वर्ष कैद फैसला गरेको थियो । हातहतियार खरखजाना मुद्दामा जेल परेका शाहलाई बाहिर निकाल्ने उद्देश्यले हरिजन पक्राउ गरेको थियो ।
मोबाइल चोरी गरेको आरोप पक्राउ परेका सुन्दर हरिजन र शाहलाई षड्यन्त्रपूर्वक रुपमा रोल्पा कारगार पठाइएको थियो । बालबालिकासम्बन्धी ऐनले १८ वर्ष नपुगेकालाई नाबालिग मान्दै सुधार गृहमा पठाउनु पर्ने थियो । तर, गम्भीर प्रकृतिको अपराधमा संलग्न रहेका शाहसँगै रोल्पा पुगेका हरिजनलाई शाहको कैद भुक्तानी गर्ने गरी नाम साटफेर गरिएको थियो ।
२८ मंसिर ०७७ मा नाटकीय रुपमा सँगै रोल्पा पुगेका हरिजनको सजायको ठाउँमा शाहलाई राखेर जेलबाट निकालिएको थियो । रोल्पा पुगेको एक महिना २० दिनपछि पुस २८ मा सुन्दर हरिजनको नामबाट विजयविक्रम शाह जेलबाट बिदा भए ।
खासमा उनी फागुन २०७९ सम्म जेलमै बस्नु पर्ने थियो, तर दुई वर्षअघि २८ पुस ०७७ मै छुट्दा सुन्दर हरिजनलाई षड्यन्त्र गरी जेलमा नै राखिएको थियो । विजयविक्रम शाहको ठाउँमा थप दुई वर्ष जेल बस्न लगाइएका हरिजन मृत भेटिएसँगै प्रहरीले शव बुझ्न दबाब दिएको परिवारले जनाएको छ । उनको अन्तिम संस्कार हुन सकेको छैन ।